中午時份，置地廣場門外偶遇選委C，俾佢捉住傾幾句。一啲選委經常要對官人講官話，碰到左丁山呢類閒人，就鍾意講閒話。佢啲閒話又幾好聽喎。
選委C話：「最近參加酒會，喺會展中心碰到熟人無數，因為人太多嘞，我走埋一個角落頭唞唞氣。點知離我不遠處，曾蔭權司長竟然亦係靜靜哋企響度，冇人同佢飲杯傾偈噃，想起三年前陳四萬喺酒會中如穿花蝴蝶，到處俾人包圍，與今年曾司長站在一旁嘅情景對比認真強烈，亦可知道香港人之精於走位。」走位？踢波呀？跑馬呀？唔係，即係知道走埋去邊個度，唔好碰埋邊個度，呢樣技術，左丁山最唔識得操控，所以成世走寶，得個捱字。
選委C又講到國慶酒會，董特首發表談話。選委C話：「以往人人一聽完特首講幾句善頌善禱說話之後，拍手掌就鬆人。今年有奇景，因為董特首興致勃勃，講講吓香港優勢，突然轉話題講基本法第二十三條立法，與會人士即刻靜靜雞鬆人，到特首講完，三分二人已經走咗，唔知係唔係無言抗議，用腳投票呢？」咦，出席酒會者，全部係有頭有面愛國人士喎，選委C有冇眼大睇過龍呀？選委C有一票在手，經常俾人拍膊頭，對一啲人大代表拉票手法，不以為然，不過選委C完全唔介意，佢話：「老細叫我出面做選委，叫我點投票，我好心安理得！」