港股噚日在平淡倉盤支持下上升107點，收8965，恒指9000水平明顯有阻力，成交48億元。盈富基金（2800）噚日只售出500萬個單位，轉趨淡靜。最多陰謀論嘅黑客話，市場傳政府使橫手認購盈富，然後拆散在市場沽出，務求在18日內將今季盈富清倉，真係信不信由你。
tom.com（8001）噚日勁升13.4%，收報1.61元，成交達4667萬元。Cookie話聽到有美資大戶增持。據聞美資大戶與超人關係不俗，加上美國雅虎業績不俗，所以趁勢入市捧場博反彈，市場同時亦憧憬超人斥資增持。最近超人斥資數以億元計增持長和系，而tom.com市值咁細，只要超人攞少少錢出嚟，即可托至天咁高。
中國電信傳招股價介乎1.48-1.71元，PE定價相對於中移動（941）及聯通（762）雖然較低，但不算太吸引，若以股價較現金流量折現值的折讓幅度計，中移動及聯通之折讓就遠較中電信吸引，所以芬佬會否換馬至中電信仍然是未知之數，不過既然中電信決定上市，就必會出盡法寶吸引資金，因此除非取消上市計劃，否則資金換馬行動實難避免，而一向積弱的聯通勢成為拋售對象。
噚日唔少炒股出現異動，信用卡防盜（1051）勁升26.5%，媒體世紀（8160）升26.2%，辰達永安（1189）勁升20%。不過，阿虎聽聞有一位CC字頭嘅炒家手緊，好想骨水，佢旗下一間證券行重可能會在短期內摺埋，所以小心為炒。
國家稅務局收緊地方政府的稅務優惠，深高速（548）旗下公司首當其衝，稅率由7.5%急升至15%，導致股價全日插水逾10%。由於事件影響廣泛，部份紅籌及國企股可能會繼民企股之後，成為被拋售對象。
阿虎