和海洋公園一起長大的香港人，聽到「海豚」二字，腦海出現的畫面不外乎一幕幕馴獸式的「馬戲表演」。但當我在東澳洲Moreton島的黃昏，踏上Tangalooma度假村的長橋，等待野生海豚的出現時，原來心情可以如此緊張。夕陽西沉，當第一條海豚用牠的背鰭劃破寧靜的海面，旋即現形於漆黑海水中，在場人等齊齊發出興奮的尖叫。入夜之後，沙灘隨即上演一齣「魚」樂無窮。
記者、攝影：余敏
興奮主打
心跳加速等待主角
看看表，18:30，急急離開度假小屋步向沙灘，因為酒店的員工曾經提醒我們，海豚將在19:00左右蒲頭。這個約會每晚都會出現，因為度假村的全名是「TangaloomaWildDolphinResort」，沒有了每晚的飼餵海豚項目作招徠，遊客必定銳減一半。
九月的澳洲春回大地，但走上原本用以登船的木橋，海風依然刺骨。但遊人已經赴會，各自焦急地向漸黑的海面搜尋，等待野生海豚的出現。一片喁喁細語中，歡呼聲忽然響起，閃光燈隨即狂閃，恍如置身荷李活大道、目睹剛踏出車門的名人，牠們來了！接近燈光的淺灘，我看到三條海豚作先頭部隊率先抵埗，頑皮地四處游走，不時躍出海面，換來歡呼連場。
餵飼活動沒有隨即開始，懵懂的遊客惟有繼續等，八條海豚也全部登場，原來每天來的，都是這八條，而我們亦在不停地閃燈拍照。身邊有個很嘈吵的澳洲男童，不停叫着一堆名字：「Fred、Tinkerbell、Echo……」我問他：「是海豚的名字？」「是的。」「你認得他們？」「不難呀，我每年都來，我和牠們是朋友。」
我向這位名叫George的十歲男童求教，怎麼認得這九條海豚。「基本上要看牠的泳姿、習慣和膚色，Fred脾氣最好，唔會爭食；Tinkerbell身體淺灰色，背部非常光滑，等一陣你留意吓，三條人龍牠只會入第二線，唔會行錯隔籬；Echo就好鬼八卦又有性格……」嘩，細路，你咁醒，入嚟做童工講解海豚，必紅！
同George吹水吹咗半個鐘，工作人員先有進一步行動，讀出飼餵海豚七戒，例如唔畀用相機閃燈，以免嚇親海豚；除咗餵魚，唔畀用手觸摸海豚之類，就好似海豚保母一樣。
食物已經一早準備好，係一大桶死魚，遊客唔畀自備食物餵佢，確保健康咁話。我餵的是Echo，我都認得佢啦！跟住「保母」赤腳行入水中，海水冰涼入心。Echo已經好有耐性咁，將身體擱在淺灘，望住我手中嗰條死魚，郁都唔郁。好了，「保母」終於讓我行動，我把魚遞過去，Echo張開口一吞落肚，我見到佢望住我笑（主觀感覺），原來嘴裏面有幾隻好細的牙仔。跟住佢就游咗開去，將個位留番畀第二條海豚，就似個乖巧的小朋友，雖然限制多多，但能夠近距離餵海豚，都係第一次，所以一樣好興奮。
附加精采
彩色沙漠玩滑沙
由於Moreton島屬於布里斯本附近海的沙島，所以玩滑沙，可以說是這裏的指定項目。我們乘坐越野卡車，沿路已經看到茂密的樹林下，樹根都紮在沙堆深處。直到卡車將我們帶到一望無盡的沙丘，才驚覺自己恍如置身以滑沙聞名的杜拜沙漠。
我第一次玩滑沙，雖然早被告誡眼耳口鼻都會入沙，不過沒有人在意，只管跟着教練指示，曲腳、提手肘，將身體蜷縮在滑板範圍之內，隨即縱情滑下。感覺是快到你無暇思想，身體已滑落至谷底，沿路飄沙四起，撲向你的五官，無處可躲。之後收到酒店隨團攝影師賣給遊客的滑沙相片，相中自己英姿颯颯，但其實風光背後，即使沖完凉，眼睛耳朵都隨時摸得出幾粒沙畀你，十足玩魔術。
島上的刺激活動，還有一種名為ATV(AllTerrainVehicles)的四驅車。無論有無車牌，都可以玩，不過就要簽下生死狀，話明後果自負。唔使太心慌，其實車隊中有兩部小型的ATV，馬力較細，可以畀初學者慢慢揸。好榮幸，我駕駛的正是這部小型ATV，雖然唔多識扭軚，但也左搖右擺地上了路。
沿路的「沙塵」景觀同剛才走入沙漠深處的景致無異，不過最讓人叫絕的是當ATV駛到沙地的最高點時，視野忽然開闊，海天一色，全個Tangalooma度假酒店盡在眼底，連廣角鏡亦無法將眼前美景收入鏡頭。大家都跳下車，紛紛將這片沙丘和碧波萬里的太平洋攝入鏡頭。
出門提一提
簽證：持特區護照可上網
機票：乘澳航直航往布里斯本機場後，轉乘約15分鐘巴士即抵碼頭，再加約一小時船程可抵Tangalooma度假村。通常購買兩日一夜Package車費及船費全免，包餵海豚及滑沙，但ATV四驅車則需另外付費，AUD$45/45分鐘。
旅行團：東瀛遊澳洲八天豪華團(ABB08)，行程包括開恩茲、布里斯本、黃金海岸、自然農莊、奇妙螢火蟲、Tangalooma及藍山三姐妹峯，逢星期一、二、四、六出發，10月團費$8,599起，11月團費$8,399起。查詢：23681277。
貨幣：1澳元(AUD)約兌4.27港元
鳴謝：東瀛遊、澳洲旅遊局、澳洲昆士蘭旅遊局、澳洲航空公司、GORE-TEX