小初早前提過第一天然食品（1076）大股東減持，股份落在炒家手上，但股價不但唔炒上，反而炒落。
經紀陳話，原來班炒家入貨價好平，當時股價喺40仙樓上，炒家趁業績好消息出貨，隻股一度插落去最低26仙，噚日就跟隨大市造好，升7.58％，收35.5仙。
經紀陳話，家陣個市咁差，炒家要散貨真係唔容易，就算入貨價勁平都係咁話。近日佢聽到有份搓波仔嘅行家講，好似幕後會作出協助，稍後就會有一系列公關推廣活動，增加公司透明度，但真正目的，可能只係借勢炒一轉散貨。
另外，小初提過就快改名做玉皇朝嘅環球飲食（2981），當股份拆細後會有搞作，之後股價果然徐徐上揚，噚日再升10.3％，收37.5仙。
若以隻股1拆5之前嘅股價計，相當於1.875元，可惜成交量始終唔夠，仍然係私人Party局面，冇乜外人夠膽亂掂。
慕容小初