新車速報：
歐寶Corsa加Kit更型

新一代歐寶Corsa自在港推出以來，一直備受車迷追捧，並先後推出多款改裝型號，以迎合不同用家口味；最近，代理又運嚟一部加裝有包圍嘅三門版Corsa抵港。此車除有齊車身包圍外，另外重改換上15吋跑車合金軨組合，睇落真係好似成部小跑車咁㗎！
記者：伍旋卓
攝影：陳偉林　

跑車造型見魅力
雖然大家眼前呢部Corsa，望落與原有型號大致相同；但當細心留意下，就會發覺佢不但裝有車頭擾流器、跑車化鬼面罩及車身兩側裙腳外，重加有Irmscher嘅油箱蓋，兩邊車門B柱上更貼有Irmscher嘅碳纖維裝飾，響四輪15吋跑車合金胎軨同車尾定翼襯托下，小跑車形象可謂表露無遺。

1.4公升引擎動力足
Corsa所配用嘅一台1.4公升引擎，表現中規中矩，但匹配一套5前速手動波箱，無論起步加速都可有敏捷嘅反應；而懸掛設定亦見不俗，當筆者將車子駛經正在進行維修嘅路面時，仍可予人有如履平地之感。最重要係廠方響隔音方面亦下了不少功夫，行車時十分寧靜，絕對可媲美一啲中型轎車㗎。

車廂配備齊全易用
車廂布局方面，依舊保留有原車嘅實用性，由高級絲絨鑲嵌而成嘅座椅承托力甚豐，乘坐倍見舒適之餘，一體化嘅中控台組合，更備有原廠冷氣及高級音響，同埋頂置有多功能顯示屏；另外重備有天窗及多個雜物匣，除能令車廂變得更開揚外，而且重方便你擺放雜物㖭。