被指係「金牌中間人」嘅黎小田，噚日凌晨時分好風騷咁喺跑馬地出現。原來佢約咗個靚女喺成和道嘅Brown餐廳及酒吧飲嘢，唔知黎小田係咪諗住夜晚十二點幾唔會有人抄牌，所以隨便將部車泊咗上Brown門口嘅行人路。
到凌晨一點，黎小田大搖大擺咁同靚女離開餐廳，雖然靚女攞住大包細包，但黎小田都一於闊佬懶理，淨係好心急咁快快手開車離開，唔通佢同靚女重有節目，所以要咁急趕下場？
原本馮仁昭想睇吓佢同靚女去邊度威，但冇耐黎小田發現有人跟住佢尾，於是就刻意慢駛，然後好冇癮咁送咗個女仔返屋企，令佢咁掃興，馮仁昭真係唔好意思啦！
不過，講開又講，原來同佢一齊嗰位靚女，就係黎小田早排簽嘅新人，叫做梁慧家，今年二十二歲。而梁慧家做緊RoadShow主持，都有啲人識㗎。
韓君婷纖體後不但身材好咗，連身手都敏捷咗。稍後佢會為仁濟三十五周年特備節目表演，佢會以身體夾雞蛋，目標係三十五隻。
前晚韓君婷喺電視城進行首次綵排，結果成績不俗，可以夾到三十三隻，距離目標只差兩隻，至於到時會唔會加碼，佢話：「首要係做到目標，之後嘅嘢，任佢哋啦。」
名媛自從轉行做時裝生意之後，同好多朋友反晒面，皆因佢做生意唔誠實。啲朋友知佢食水深都唔計較，點知佢幫人賣咗啲衫，自己着完先會交畀人，咁樣重有邊個會幫襯佢？咁都未算，係人都知名媛成日鍾意去美國歐洲入貨，原來佢喺紐約個名已經臭晒，皆因佢攞完貨拖人數唔畀錢，佢重走返香港，人哋都冇佢符，卒之紐約嗰邊冇人再同佢交易，實行將佢列入黑名單。
盧巧音噚日同陳豪喺屯門市廣場出席護膚品活動，Candy講開拍廣告，佢話唔知點解好少廣告商搵佢，但佢就好鍾意拍廣告，所以無論乜嘢產品佢都有興趣。衞生巾同安全套都冇問題喎，內衣都得，不過佢身材唔得出眾，恐怕冇乜內衣商對佢有興趣。
提到佢老友謝霆鋒俾人話喺監獄遭圍毆同用結他扑頭，Candy話冇乜留意，應該係傳聞喎，但佢會考慮寫信、寫卡或者寫首歌畀霆鋒。