雪櫃是最能挑起我遐想的家電，每拜訪人家屋企，就最有打開它的衝動，多過想打開人家的衣櫃、書櫃或碗櫃，也許是放雪櫃的東西比較有彈性，譬如會有人把濕襪子放入雪櫃弄乾，但你有見過人家把隔夜餸放入衣櫃嗎？有彈性就有可觀性了。
雪櫃裏的東西也多數有有效日期，凡有有效日期的東西就變得緊張，譬如你會為雪櫃裏的隔夜餸而推掉一個臨時約會，但你未必會為書櫃這樣做。
雪櫃好sexy，會情不自禁想搞吓佢，未必係想食嘢，但就好想睇吓有乜嘢食，雖然裏頭有乜，你點會唔知。為sexy也試過把自己放入雪櫃，但太大隻，閂唔到門。
留學墨爾本時就聽過最離譜的雪櫃故事，可分享一下，但信不信由你：離墨爾本約個半鐘車程的PhillipIsland，是睇企鵝的名勝地；某住附近的留學生，一次拾獲了一隻估計是離隊的走失企鵝仔，貪貪哋的他於是偷偷地抱企鵝仔回家，欲當寵物養，還虧他想得出以雪櫃給牠作竇，卻可憐企鵝仔，翌日就給發現橫屍家中，死因推斷是賊仔個大近視同屋，他半夜三更渴醒，開雪櫃攞嘢飲時，無戴眼鏡的他懵盛盛地讓企鵝仔溜了出來都不知，小生命就這樣硬生生地給熱死了。
（編按：康妮續稿未到，暫停一天。）
容雅慧