煮順德菜煮了三十多年的大廚標哥，得到鳳城酒家老闆首肯，沿用「鳳城」這老字號於上環開新舖。雖然是逆市開店，但甫開業兩星期已經做到日日唔停手，標哥最感激鳳城老闆畀佢沿用鳳城個名，所以更加盡心盡力，誓要將之更加發揚光大。
記者：梁佩芬 攝影：周旭文
「市道差，鳳城晚晚重做到唔停手，證明飲食業係有得做，問題在於食物質素同口碑！」
就憑這個堅定的想法，驅使何盛標等一行八人，一起離開工作數十年的北角鳳城酒家，自立門戶，在上環開始其人生新一章！十多歲就開始在鳳城跟馮滿師傅（鳳城創辦人之一）學習順德菜，從洗菜做起，至今三十年，離開北角正舖時已是廚房主管，收入穩定，酒樓生意，在現今經濟下算是安居樂業一族，還投資做生意？
「香港地搵間酒樓食嘢容乜易？！間間酒樓都一蚊一隻雞、十蚊碗叉燒飯，難得我哋近百蚊碟嘅順德菜都做到無得唞，我知吖，除咗係鳳城個名外，就係靠質。咁啱，我哋幾個都做咗咁多年，順德菜的精髓、技巧、品質都有一定保證，話晒工字不出頭，把心一橫，就決定開舖做順德菜！」
順德菜講求心思、耐性及刀章，往往一碟菜要用上幾日去熬，就算用上最平凡的材料，都可煮成珍味，化腐朽為神奇。以下經典名菜，都是標哥及其他大廚化數十年功力炮製出來，是一班鳳城老臣子極力推介的6大菜式：
鍾意食蝦餃
澳洲來港表演音樂劇《SingingIntheRain》的音樂總監ConradHelfrich及其太太，甚愛中國點心，常到澳洲唐人街品嘗中國菜。來港十多天，慣例每天到不同的酒樓午膳，今天輪到上環鳳城，他們食了燒賣、蝦餃、叉燒包。被問到鳳城服務如何？他們都覺得侍應英文水準唔錯，溝通到，所以就算菜牌無英文都得，而且他們食過的中式酒樓中最好的一間，尤其是蝦餃，蝦好新鮮，皮又薄，地方光猛，價錢比起其他中環酒家平好多，唯獨是欠缺一些設計，他們認為可以放多些有中國特色的擺設就更好。
近熟客
「北角老舖客路廣，有唔少喺中上環住或者返工嘅人都專登嚟北角開餐，我哋發覺中上環都係唔錯嘅地方，就着手搵吉舖！上環舖位平租、近住宅區、最緊要熟客多，就下決心喺上環開檔！」
開業一星期，回報理想嗎？
「我哋總投資約四、五百萬，𠵱家每日生意都近十萬，最理想都有十二萬一日，小數怕長計，最好一年左右回本啦！我哋相信，只要貨真價實，順德菜甚至酒樓都重有得做！」
店名用番老字號
「我哋成班順德佬就梗係做番順德菜啦，但問題係個酒樓名叫乜好呢？」
鳳城即順德大良，老闆知各大廚要另起爐灶，係唔係好順「得」人，有乜反應呢？
「老闆一向同我哋都感情好好，正所謂無事不可對人言，點知佢都覺得我哋有膽識，喺逆市創業，就好支持我哋（當然係某程度上金錢援助），又教我哋點做生意，話晒都係廚房佬少見人，講到做生意，都係要高人指點！」
「其實最感激都係可以畀我哋沿用番鳳城個名，不過就一定要喺前面加上環二字，話晒老闆都無直接參與行政工作，既然用得老號，就要盡心盡力，做到最好，發揚鳳城招牌，更要留傳順德菜的精華！」
內心掙扎決定過檔
「我由鳳城開業做起，四十年啦！」
何天生第一份工，就是在銅鑼灣鳳城做樓面，接着遷移至北角，轉眼間已四十多年，離開老舖時司職樓面經理，正正是鳳城老臣子，為何要跟着標哥來上環呢？
「我都算係睇住班大廚（指標哥幾位）大，佢哋由𡃁仔做起，到今日個個獨當一面，全憑佢哋嘅努力；當佢哋有心想搞酒樓，都覺得有得做，當佢哋叫埋我過嚟，內心都有掙扎過，咁大年紀，都係做生不如做熟，但後來見舊老細咁支持，話要個有經驗嘅人帶住佢哋先得，自己對鳳城菜又咁熟，就過嚟啦！」
「周啟邦伉儷噚日先嚟過」
小記影相時，他在旁喋喋不休講出各菜式的特點、煮法、食法、價錢，甚至鳳城老故事……親切友善，看到上環鳳城開業，有何感想呢？
「我初初都擔心走晒啲客，始終都係新舖，老細又新，熟客唔鍾意，生客又唔熟路，但開張頭幾日，生意都唔錯，連一啲去開北角嘅熟客，都自己識路上嚟，好似周啟邦伉儷噚日先嚟過。」
雖然現正為行政營業經理的他，每天還親自為客人點菜，個個人都話只有他，才可為客人「發辦」寫菜單。
上環鳳城酒家
地址：上環泰安街七號地下
電話：28158689
營業時間：上午七點半至晚上十一點半
座位：250個
付款方法：現金及信用卡（Visa,Master&AE）