與肥仔雄在馬會食完飯，佢堅持要請：「喂，難得我今日贏錢，你輸到暈，梗係我付鈔啦。不過我唔係會員，你簽帳之後，我畀番錢你。」兩個人食得幾多吖，五嚿水有找。簽帳之後，肥仔雄拎出一叠大牛、金牛，是但拎一張畀左丁山：「唔好咁濕碎，唔好找碎紙咯。」咁客氣，卻之不恭，正想將大牛放入荷包之際，咦，乜五百蚊紙後面有六個中文字㗎，睇真啲，上面寫住「董建華，無×用」，×乃不能見報嘅字。左丁山好驚，立即退回：「喂，肥仔雄，呢張我唔要，換過一張至得。」
肥仔雄一睇：「我都係喺馬會窗口收錢得番嚟嘅啫，點會咁㗎，你唔要，我畀邊個？」左丁山話：「你下次去投注站用番呢張五百蚊紙投注便是。」估唔到有啲仁兄或仁姐咁鬼㷫，鬧董特首都唔使將六字真言寫落張五百蚊紙啩，唔通銀紙多得滯，搵一張嚟玩吓？點解佢唔寫落張二十蚊或十蚊紙上面，寫完撕爛佢嚟發洩呢？
睇完呢句粗口，肥仔雄與左丁山從賭馬回歸現實，幾乎相對無言，好彩唔使淚雙行啫，皆因我兩個都唔係負資產一族。𠵱家社會不景，民怨甚深，無可發洩，一腔憤怒盡灌注於特首身上，呢個時候重出嚟強行推銷基本法第二十三條立法，差不多係先置殺人刀，叫市民條氣點順吖！肥仔雄嘆一口氣，話：「自己好彩重有資格到馬場玩樂，唔使去輪免費飯盒，不如再去吉澳吧飲多杯先。」