作為傳統潮州女性的翁太，平日最愛整番兩味潮州菜，好似鹹菜豬肚湯、九肚魚蠔餅、笋餃、滷水鵝等。不過最受囡囡及親朋戚友歡迎的，必是最拿手的潮州薯仔糕，翁太笑說：「試過有次唔得閒整，兩個女猛話囉囉攣好想食，所以以後就算幾唔得閒，都會一星期整一次」。
記者：區佩嫦 攝影：楊錦文
由於翁太家住上環，買餸當然會去附近的上環街市。一入街市，翁太就買斤半薯仔。要揀靚薯仔，秘訣係表面愈滑溜愈好，至於Size方面，中型較好，若然太大個，蒸熟的時間就會較耐。
要令到薯仔糕更滑，一件水豆腐就居功不淺，豆腐的營養價值高，更可消除大量薯仔食落肚後的飽滯感覺。老闆娘重叫翁太教佢煮潮州菜嘅心得㖭。
上環街市的魚蝦檔較少，所以翁太行咗一個圈逐檔慢慢睇，今次買的是硬殼蝦，因其肉質較鮮甜，蝦一定要鮮色，摸上手唔好霉霉爛爛。
在眾多潮州菜中，翁太對於潮州糕點最在行，好似呢款薯仔糕，是潮州人過時過節所食的糕點之一，有點似廣東人食年糕同蘿蔔糕一樣，專用來款待親友！翁太一星期最少會整一次，而每次都用斤半薯仔整足兩大底，不過呢兩大底往往於一日內俾人掃清，足見薯仔糕的魅力。
薯仔 1斤半
蝦米 2両
鮮蝦 半斤
豆腐 1件
豬頸肉 4両
番薯粉 4両
胡椒粉、雞粉、油、鹽各少許
薯仔糕的口感較蘿蔔糕強，加上豬頸肉同蝦肉，食落口甜中帶爽。雖然翁太話蒸熟食會較健康，不過小記覺得將啲糕煎一煎，入口鬆化更加好味。
重點一
豬頸肉是令薯仔糕爽口的最主要元素，若買唔到新鮮豬頸肉，不妨用豬腩肉代替，爽滑的口感不遑多讓。
重點二
將豆腐整爛時，豆腐會出水，切記要將水保留，切勿倒去，因可用作溝番薯粉之用。
經常在潮式菜館食到的反砂芋頭，做法原來好簡單，翁太只用了短短30分鐘就將一大個芋頭整成黐滿砂糖粒的反砂芋頭，熱食時外層脆卜卜，內裏就軟腍腍，絕對是佐酒的最佳食品。
芋頭 1個
白砂糖 1包
重點一
選擇靚的芋頭很重要，芋頭一定要輕身，要粉，否則會破壞整個甜品的味道。
重點二
製造反砂芋頭的重點在於將砂糖熱溶，煮砂糖時必定要用慢火，否則砂糖會燶。