今屆亞運重有四日就閉幕，好多人都想知邊個有牌運動員會做港隊閉幕禮大旗手呢？
按港隊過去參加大型運動會嘅慣例，通常會選攞咗金牌嘅運動員做閉幕旗手；而小記趁噚日搭車就諗，港隊本屆至今嘅金牌得主係李麗珊（風帆）、趙詠賢（壁球）、張鈺及帖雅娜（混雙乒乓球）同桌球隊（隊際）。
不過，趙詠賢同桌球隊早已返咗香港，至於成功衞冕嘅李麗珊就因為腹絞痛連金牌都冇攞就回港入院做檢查，乒乓波眾「國援」亦於今日抵港。
計嚟計去，覺得兩銅嘅黃金寶比較有機會：首先單車隊已經返咗香港，但「阿寶」就一個人留低休息同睇吓落山單車，咁當然會出席埋閉幕禮。港協會長小霍都話阿寶係唔錯嘅選擇，亦有高層話絕對有咁嘅可能。
講真阿寶喺公路賽面對眾中亞世界級車手圍攻，重頂得住攞個銅牌，喺場地賽又失銀得銅，表現真係好好；加上佢又係百分之百港產優質運動員，選佢做就一定「合情又合理」！