多得美股唔少，港股又跌。恒指跌118點，收8858，雖然低過911後低位8894，但由低位已經反彈86點，有心人入市，短期大市有望技術性反彈。
想喺呢少少技術性反彈過程中搵食，可以諗啲恒指Call輪，對象有兩件，都係明年3月28日到期，即9552同9553，前者交投多過後者，波幅稍大。𠵱家賭輪，無論喺Call或者Put，隨時轉軚，切要眼明手快。睇大市反彈而揸恒指Call輪，有錢落袋就要落車，提防個市彈完之後又再落過。
8號仔俾人柴台柴到飛起，小小超出嚟講嘢，話後年會派4厘半息，股價冇再落，爬番高1格。有啲股份俾人唱話唔得之時，唔知係咪面子問題，股價反而有反走勢。
和黃（013）又跌1.40元，又係俾人唱話啲3G生意大劑。「8號仔」俾人柴台柴得幾嘢，股價好番（1啲啲），和黃會唔會又有翻版？
細細注博吓和黃Call輪，對象係9516同9518，注碼宜怡情，擊中要走人，擊唔中亦要走人。
呢兩件輪價雖然細細，睇錯市做錯嘢，氹仔一樣浸到人重傷。記住炒1日係短線，炒3日係長線。
章盛