四歲女童雪兒因急性血癌日前病逝，父親黃先生飽受喪女之痛，還要照顧不堪刺激而數度自殺的妻子，暫時無法工作，愛女的殮葬費及一家生活也成問題，蘋果日報慈善基金即時撥款應急。
「我哋一家五口，一直以嚟都生活得好開心，點解突然間好似乜都冇晒，成頭家散咗。」四十五歲的黃先生黯然地說。
精靈活潑的雪兒，一直是父母及兩名哥哥心目中的小天使，無奈因為染上惡疾而結束了她短促的一生。
今年四月下旬，正念幼稚園的雪兒，因為咳嗽良久未愈及身體經常無故瘀傷被送入院檢查，醫生證實患上急性非淋巴性血癌。
「真係發夢都諗唔到，囡囡平日咁健康，竟然會得個咁嘅病，我兩公婆個心真係好難受。」黃先生表示，由於女兒情況嚴重，妻子遂立即辭去侍應一職，陪伴愛女接受化療。
一臉憔悴的黃先生搖頭歎道：「呢段日子，一家人所受嘅痛苦，唔係筆墨可以形容。囡囡捱苦，老婆要廿四小時留喺醫院照顧佢，我朝早搵食，晚黑就趕返屋企睇住兩個仔，重要抽時間去醫院探吓佢兩母女，精神、體力都好辛苦。所以大家都好期望雪兒快啲好番，唔使再過呢種生活。」事實上，經過近半年的治療，雪兒的情況曾一度有好轉，亦為黃生夫婦燃起過一絲希望，惜最終還是逃不過死神的魔掌。
日前，剛完成所有化療療程的雪兒，突然受細菌感染引致急性肺炎及心臟衰竭等併發症猝死，叫家人肝腸寸斷。由於黃妻無法接受喪女的事實，情緒失控，數度企圖自殺。「雪兒過身嗰晚，我老婆已經成個人癲晒，抱住個女條屍幾個鐘頭唔放手，成日怪自己冇好好照顧佢；返到屋企，又匿埋吊頸、割脈，想跟埋雪兒一齊去，幸好及早獲救，我真係好心噏。」
目前黃妻仍要留院觀察，殮葬的事宜及照顧一對幼子的責任，全落在黃先生身上。「𠵱家屋企搞成咁，根本冇辦法開到工，手停口停，囡囡嘅身後事、一家人嘅生活都好成問題。」自妻子辭職後，任鋼材用品推銷員的黃先生，每月便以六千多元的收入及社會福利署發放的低收入綜援金，支撐一家五口、包括一對分別七歲和五歲兒子的生活，日子捉襟見肘，委實沒有多餘積蓄應付遽變。
蘋果日報慈善基金有見黃家境況堪憐，遂撥款二萬元助他辦理亡女後事，及應付短暫生活需要。
捐款編號：C0712
暖流熱線
電話：29908688
傳真：23702192
電郵：
網址：