中國男足新一代喺今屆亞運目標係要打入決賽，點知日前就輸畀日本八強踢出局，令唔少中國球迷失望，就連亞洲足協秘書長韋立本都忍唔住口，話中國足球再唔急起直追，想辦世界盃決賽周都幾難！
自從中國完成打入世界盃決賽周歷史使命之後，中國足球好似一個洩氣皮球一樣，喺亞洲賽成績麻麻，亞運會八強出局。早前喺亞洲青年錦標四強又輸畀也門，加埋世界盃一分同一個入球都攞唔到，原本好支持中國申辦世界盃嘅韋立本好難做；因為中國足球持續無進步，都唔知用乜理據幫中國同國際足協討價還價。
我求大俠就好贊成韋秘書長講法，淨係睇搵國足新教頭搵咗幾個月都未得，話晒「快人一步、理想達到」，重用「二波」上斜路，遲早連日、韓車尾都見唔到！
班霸即係班霸，拜仁慕尼黑啱啱就中場戴斯拿為國家隊受傷一事，成功從德國足總索償過千萬港元，呢件事充份反映拜仁牙力夠，冇計啦，咁耐以嚟拜仁為國家隊提供咁多國腳，簡直係國家隊米飯班主。你試吓搵禾夫斯堡或者波琴向德足總索償吖，有人睬至奇。
皇家馬德里不愧係當代班霸，隊中有施丹、費高等十三個人響呢輪國際賽歸隊服役，真架勢。不過威係有代價嘅，呢班國腳要下禮拜四至全數返到皇馬報到，但兩日後即刻要作客桑坦德。唔知我哋啲名家到時會貼咩，我求大俠就踩過界貼定下盤先嘞。
英格蘭領隊個緋聞女友歐麗嘉本自傳，準備響周末出街，係人都知入面一定有啲關於佢同艾歷臣嘅猛料爆。諗落呢位明星仔都幾厲害，識響呢排國家隊有比賽出書，唔知本書出街之後，會唔會影響艾歷臣同埋英格蘭嘅比賽呢。
國內體育網站成日搵到啲鮮為人知嘅消息，我求大俠有時都從中攞到寫稿靈感，不過有啲獨家料外人難求證，吹水都唔出奇；所以有網站最近響文章底下落註腳，話有啲消息真實性有待確定，鋪定後路，例如前日本教頭杜斯亞拒絕到中國教波。睇到呢啲消息就要看官自己判斷真假啦。
逢周一至周五見報