香港電台第二台DJ梁繼璋，早排揸車車佢太太莊嬿藍出外時，兩度撞車，最令人擔心嘅係佢太太有咗身孕，好彩兩次撞車都冇影響個胎，可以算係不幸中嘅大幸。
不過，馮仁昭唔係導人迷信，只不過有時啲嘢真係唔到你唔信，好似梁繼璋咁，佢為咗就嚟推出嗰本小說《惹鬼的電台節目》，走咗去墳場影相，諗住加番多啲恐怖氣氛，點知影完之後，佢就無端端連撞兩次車，你話係咪好邪？
早幾日馮仁昭同梁繼璋傾偈，話佢老婆既然有咗，就唔應該寫埋啲鬼書。原來梁繼璋曾經都有諗過呢個問題，但佢認為呢本始終係消閒書籍，唔想導人迷信，而且梁繼璋又話自己就嚟做老竇，唔搵定奶粉錢又點得呢？
噚日收到嘉禾發言人杜惠東電話，佢話套賀歲片終於落實會開拍，卡士仍然係梁朝偉加楊千嬅，導演係谷德昭，戲名暫定係《行運超人》。馮仁昭相信搵到偉仔做，價錢方面偉仔一定有讓步，唔會堅持收六百萬，杜Sir話：「價錢方面的確係大家協商咗，但實際係幾多錢，咁你哋最好問番偉仔啦！套戲下個月開工，大部份都會喺香港拍。」
何韻詩和盧巧音噚日去銅鑼灣出席Levi's活動，佢哋更獲得Levi's送出兩條鑽石牛仔褲，不過何韻詩一見到露出胸肌同胸毛嘅男模特兒即刻表現得十分尷尬。何韻詩事後否認自己怕醜，重話：「喺我字典入面係冇怕醜呢兩個字，頭先我喺台上扮嘢咋。」至於會否介意男友有胸毛，何韻詩就話最好盡量少啲，佢話寧願要屋企隻貓啲毛好過要男人嘅胸毛。
炭頭紅星𠵱家係無記首席小生，內地同台灣都搶住搵佢拍劇，原本台灣肯出十五萬一集搵佢同大S及F4拍四十集嘅古裝劇，拍完炭頭就可以袋六百萬。套劇賣畀無記就開得成，點知嗰套劇嘅台灣版權俾東風電視台攞咗，咁無記嘅台灣電視台梗係冇行。
加上，東風個老闆呢輪同無記搞到唔係咁開心，所以無記老闆下令冇交易，咁下面啲人當然唔敢放炭頭紅星拍呢套劇，結果大拿拿六百萬嘅收入就係咁見財化水啦！
台灣人氣組合F4下個月三十號會嚟香港，出席百事喺九龍灣展貿中心搞嘅千人派對。呢個派對認真大陣仗，台灣、內地同香港都會抽出幸運兒參加，香港有三百個名額，大會重會大手筆為內地同台灣fans包機嚟香港，有份出席嘅幸運兒將同F4對足三個鐘，個千人派對會分兩部份進行，出席嘅fans除咗可以聽F4唱歌外，重可以同佢哋一齊玩遊戲。
林嘉欣以七位數字接拍護膚品Regene嘅廣告，而張栢芝亦都係呢個品牌嘅代言人。嘉欣話唔怕人哋話佢搶栢芝飯碗，因為佢只係新產品嘅代言人，自己亦從來冇同人比較。而嘉欣亦都好關心謝霆鋒嘅情況，佢都希望對方會冇事，話晒大家都一齊合作過拍電影《戀愛行星》。