港股噚日無起色，再跌118點，收報8858，成交只得48億元。電盈（008）上午一度跌破0.90元，阿虎嘅電郵信箱同時從四方八面收到關於「電訊盈fall」之電郵，打開一看，原來又係一首電盈悲歌，歌名為「電訊盈fall」，曲寄「好心分手」，新詞如下：
「是否好驚訝 講不出說話
又試繼續跌 跌穿一蚊啦
曾給我存幻想 Hi-Tech好景
何解會跌到咁低價 你知嗎
回頭望 廿八蚊 為何那時未沽貨
彈兩仙 又再fall 成為蟹民是我儍
電訊股 全面跌 胡塗帳目也增多
沒遠景 負債多
Hi-Tech泡泡已驚破
來年帳目也坎坷 Fund佬天天沽貨
人人四面聽楚歌
若寄望有朝返家鄉
不如劃張MarkSix好過」
阿虎其實唔係好識唱呢首熱門歌，但睇過歌詞後亦好感慨，內心疾呼：「好心啲股民同電盈分手啦。」
噚日傳出有歐資基金減持新地（016）等地產股，新地股價應聲下挫3%，收報45元，成交高達3.03億元。長實（001）亦挫3%，收45.40元，成交達2.1億元。據聞該基金重未完成減持行動，董建華接近收市時，在立法會表明短期無法有效救市，但就會做啲嘢，希望樓市可以有少少反彈，如此言論相信好難阻止地產股繼續被拋售。
希域投資（905）噚日勁跌43%，收報0.159元。據聞因為股權交易方面有阻滯。大股東林兆榮原本以1168.71萬元出售20.83%股權予董事戴雅林，每股作價為0.46元。不過有關交易一拖再拖，據講有人想縮沙，或者想將收購價調低。希域噚日收市價較收購價0.46元低65%，畀着阿虎都會打退堂鼓。
阿虎