有人話「落寞時莫看夕陽」，趙飛雲亦話「悲觀時莫看美股」。杜指走勢一浪低於一浪，最慘是猶如黑洞，不知何時見底？前日連超級大好友的高盛女股神科恩女士亦宣布調低美股指數預測，美股前晚急跌，或多或少與此有關。
杜指周三晚走勢認真差，跌穿7400支持後反彈無力，以接近全日低位7286收市，大跌215點。早前趙飛雲度位，話過美股會下試7000水平，估唔到咁快已接近，至於下個支持位暫時唔想再提，等杜指真正跌穿7000再講，因為始終相信美股大超賣，反彈隨時出現。
相對美股而言，港股噚日走勢算硬淨，恒指低開高收，最後只跌118點，收8858。早前亦有提過，港股累積跌幅大，淡友其實相當審慎，期指尾市傾向計數平倉，避免冒過夜風險，故經常出現尾市由期指帶動反彈的走勢。
現時港股除了RSI超賣背馳外，其他技術指標均偏淡，後市並不樂觀。近日技術走勢有改善的中移動（941）及新地（016），經噚日下跌後，技術形態已有轉弱迹象，可能要再考驗近期底部支持，周三剛展開反彈的長實（001）及和黃（013），升勢曇花一現，噚日大幅回落，和黃更創出99年以來新低41.30元。
趙飛雲繼續持有恒指Call輪9552，心態其實類似被困危城，知道援兵將至，希望多撐一會兒，能夠反敗為勝。當然，損失的底線不能多於20%。
趙飛雲