近排上市嘅投資公司，一係冇人玩，一係就搭晒棚亂炒，好少話會勁跌，但噚日偏偏就見希域投資（905）股價急跌43%，收15.9仙。
小初原先以為係斬倉，但經紀陳話，應該係街外有個大戶想轉按股份唔成，搞到股價急跌。至於希域方面，就出咗個例牌通告，話唔知點解股價下跌。
經紀陳話，希域舊年控制權易手，連帶街外捧場客都一齊轉埋，皆因投資公司呢家嘢，若果唔係熟朋友，真係唔會亂捧場，之後希域成功批過一次股，集資咗幾百萬銀。
不過，控制權易手一事，原來直至家陣重未完成，至於原因就唔方便講，但係街外有個捧場客，唔知係咪因呢件事，周圍都搵唔到水源，所以局住要沽貨，引起股價急跌。
講起股價急跌，小初又想講吓金衛醫療（8180），噚日急跌11.4％，收1.24元。
不過，最奇係大摩剛剛出咗份報告力讚，睇嚟摩笛有時都未必掂。
慕容小初