各方想選人大嘅人馬，在國慶期間都紛紛蒲頭，四出拉票，但一早就話有意參選嘅朱幼麟，卻連最重頭嘅十一國慶酒會都不見人影。八方噚日見到佢，先知「十一」當日佢去咗石澳，打算以滑翔傘飛行賀國慶，點知飛唔起。
飛天朱將失敗原因歸咎「國旗阻力真係好大」。原來飛天朱興致勃勃自製一幅六呎乘九呎嘅超大五星旗，綁在滑翔傘尾部飛。其實七月回歸時飛天朱已經試過類似玩法，綁住兩幅國旗及區旗，成功起飛。
今次飛天朱自認貪心，超大型嘅國旗原來有好大風阻，令佢個滑翔傘急速下降，十五分鐘就墮地，無辦法呈現「五星紅旗迎風飄揚」嘅景象。
不過飛天朱誓不言敗，話下次會搞新意思，綁住自己隻寵物香豬上身，一齊飛上天，等佢做名副其實嘅飛天豬，八方就擔心佢會否俾人告虐畜。
傳真︰2623-9278
電郵︰