李彩樺最近考獲車牌，日前她到灣仔大發車行睇車，但她一向鍾情的HelloKitty私家車禁入口，所以她轉移目標，睇中價值八萬多元的Gino座駕。離開車行後她一時技癢，不用司機，自己駕駛保母車。
十八歲的李彩樺（Rain）最近考獲車牌，一向鍾情HelloKitty的她，曾透露有意購入HelloKitty版大發Move私家車。日前本報記者見阿Rain與經理人公司的同事，乘坐保母車前往灣仔大發車行睇車。
阿Rain抵達車行後，左顧右盼，不停睇車，她對仿MiniCooper款式、價值約八萬多元的Gino情有獨鍾，其間她曾揭開車頭蓋和車尾箱，又坐上司機位研究軚盤。她和車行經紀傾談期間，表現得十分雀躍。
阿Rain在車行中逗留了約二十分鐘後，即與公司同事步往隔籬街，等候保母車接送。當保母車駛到，阿Rain突然走到司機位，要求司機讓她駕車，而司機就坐在其身邊「監督」。雖然阿Rain是新牌仔，但她的駕駛技術有板有眼，轉彎時亦有望倒後鏡及打燈，相當小心。
其後記者致電阿Rain，她在電話中說：「其實我想買HelloKitty車㗎，不過個sales話香港出過兩部呢啲車，後尾因為啲機件唔啱喺香港揸，所以冇得賣啦。當我見到嗰架Gino，覺得都幾靚，合乎我鍾意cutie車嘅要求。我𠵱家重未決定買唔買，會再睇吓先。」
問阿Rain當日為何自己駕駛保母車？她哈哈笑說：「我呢排做完嘢都有叫司機畀我自己揸車返屋企，有個免費師傅（司機）坐喺隔籬教路，超正呀。」
採訪、攝影：朱芷瑩