擁有十四年歷史的清水灣電視城，歷盡香港電視史變遷，但明年初，此地卻會成為歷史，話劇組廠房會全部遷往將軍澳新電視城。
電視城內的十個廠房、古裝街、民初街、餐廳、邵氏大樓以至邵氏宿舍等，多年來都被無綫物盡其用，每一個地方、每一個角隅，都曾被不同劇集及綜藝節目取景。已為無綫效力十年的「一姐」宣萱，特地在清水灣電視城「退休」前，帶我們參觀六大必到景點，順道緬懷一番。
《1》
民初街：「民初街又叫六場地，呢排夜晚重播林家棟同周海媚主演嘅《大鬧廣昌隆》都係喺呢度拍，我都有晚晚追㗎！我唔係『小芙蓉』，唔識扮鬼飛，扮住哈
利波特先啦！」
《2》
六場地教堂：「呢個教堂係咪好熟口熟面呢？因為TVB嘅藝員幾乎都喺度結過婚，好似喺《男親女愛》入面，阿MissMo（鄭裕玲）發夢同小強結婚，都係喺呢度拍嘅。」
《3》
古裝街：「無綫所有古裝劇都一定會喺呢度取景，𠵱家大家晚晚睇緊嘅《皆大歡喜》，都係喺呢度開工㗎！等我都學人炒一下道具栗子先得。」
《4》
一廠化妝間：「TVB所有大型綜藝節目，演出嘅藝人都係喺呢度化妝同整頭，每年台慶啲藝員返晒嚟，呢度就會好熱鬧，今晚呢度就會錄影曾志偉主持嘅《吾係獎門人》，借個假髮嚟影吓相先。」
《5》
一廠猛鬼女廁：「我聽人講話以前有人喺呢度洗手嗰陣，由塊鏡度見到後面企咗隻鬼，我自己咁耐以嚟都未見過，touchwood先。我又聽過啲人話六、七廠嘅女廁有嘢，有人重話四場地有隻大頭鬼喎。」
《6》
邵氏大樓：「呢度成日都扮醫院景，以前嘅《妙手仁心》除咗喺大埔那打素醫院拍之外，亦都喺呢度拍咗唔少戲㗎！」
採訪、攝影：朱芷瑩