楊恭如上周六被當眾掌摑，其身在上海的緋聞男友、上海首富周正毅，昨日透過長途電話力撐恭如，直認事發後曾致電慰問伊人，又表示返港後會繼續與恭如約會。周正毅今次不顧妻子毛玉萍的感受，公開為女友講好話，楊恭如可謂贏盡面子。
楊恭如上周六在銅鑼灣COVA餐廳遭人當眾掌摑，事後傳媒焦點一度落在其緋聞情人、上海首富周正毅身上。本周一傍晚周正毅與姪兒返回上海，而其妻毛玉萍則一直未有露面，只向外聲稱自己患上感冒。
呢啲嘢我從未講過
昨日身在上海的周正毅接受商台節目電話訪問，言談間處處維護他聲稱是其「老鄉」的楊恭如。過去周正毅的妻子毛玉萍出席活動時，只要一聽到楊恭如的名字，必定即時面黑，今次周正毅公開為楊恭如講好說話，可謂完全當毛玉萍「冇到」。
周正毅被問到早前曾否認早已與楊恭如相識一事時，他竟反口說：「冇，呢啲嘢我從未講過，因為大家以為我哋好似偷偷哋唔知做乜咁，有個誤解，其實大家係上海老鄉，係朋友嚟嘅。有好多嘢我都未講過，從來都未同記者講過嘢。」對於早前有報道指他叫楊恭如不要破壞其家庭一事，周正毅亦否認說：「我未講過。」
過咗去講都冇意思
問到周正毅經此事後，會否繼續與楊恭如來往？他說：「我同佢都係大人，大家知道自己做法係點樣。」談到他與楊恭如的關係時，周正毅說：「大家係好朋友，冇乜其他關係。」與楊恭如的「好朋友」關係是否影響到他與太太的關係？周正毅說：「冇，我唔想將楊恭如同我太太黐埋一齊講。」
問到對楊恭如的為人有何看法時，周正毅則說：「佢好乖，出面啲人亂講都冇意思嘅。」
周正毅其後被問到楊恭如被掌摑期間是否在場時，他似不願多談，只說：「呢啲我唔想講，唔好意思，過咗去啦，𠵱家講都冇意思。」但周正毅卻表示事後曾致電問候楊恭如，他說：「我都有打電話畀佢，佢話『冇乜嘢，不過係心情唔定囉，其他都冇乜嘢！』我就叫佢下次小心啲。」
至於楊恭如的經理人文雋日前表示有意為她聘請保鑣一事，周正毅卻指沒必要，他說：「我覺得冇意思啦！香港係法治社會，冇可能發生啲離譜嘅嘢。」
我得閒都冇所謂㗎
對於日前有報道指周正毅買樓送給楊恭如，周正毅笑說：「我覺得好好笑，佢冇必要叫我買樓畀佢，佢自己都有錢賺，我覺得佢唔使靠人，更加唔使靠我啦！」
外間一直有傳周正毅與毛玉萍並沒有正式註冊結婚，他昨日表示不想回答此問題。最後被問到回港後會否再與楊恭如約會時，周正毅說：「我得閒都冇所謂㗎！我得閒都唔知佢得唔得閒啦，冇嘢㗎！冇問題。」