電腦專題：
日本經濟冇起色港客秋葉原掃冧價IT產品

全球經濟持續低迷，連日本大國都頂唔住，物價再唔係高不可攀。筆者近排到日本工作，發覺連遊客必到嘅秋葉原電器街，都出現大幅冧價現象，如果用埋Point卡，重有20%現金回贈，一向精明嘅港客當然唔會錯過大好機會，紛紛以平過香港黃金腦場價勁掃心頭好。記者、攝影：徐影龍

富士新機一出即跌。
Dicky原為室內設計師，對數碼相機情有獨鍾，差不多每年到日本旅遊，都會買部最新型號機種，今次目標係富士最新嘅一系列xD卡數碼相機。終有收穫嘅Dicky話：「其實富士三部xD卡新機都有得賣，原本心大心細都唔知買邊部好，不過喺秋葉原發覺A202勁冧價，只賣22,800日圓（約港幣$1,400），比原定售價31,000日圓（約港幣$1,900）平一大截，所以最後都揀咗A202。」

托部Printer返香港都抵。
香港近年興起DV熱潮，William就喜歡將拍低嘅生活片段製成VCD，不過自行燒錄始終爭個貼題嘅CD面。「當知道EPSON在港推出可在CD面打印嘅Printer時好想買，後尾至知只得A3型號，賣價要六千幾。嚟到日本見到原來重有部印A4Size嘅PHOTO890C都可印CD封面，即刻心郁郁，見到Yodibashi標價二萬六千日圓（約港幣$1,600）我都諗住買，點知到畀錢時先發覺做緊特價，再平五千日圓，即係約千三蚊港幣就有交易，最後重用埋個20%購物回贈買多套墨盒，部機變相只係千一蚊，就算辛苦啲托返香港都值得。」

我恨咗呢部ClieNR70好耐。
世傑一向鍾情Game同相關精品，最大收穫居然係買咗部SONYClieNR70，原來佢恨咗呢部夢幻機好耐。「SONY一出PDA，淨係外形已經殺晒，尤其係呢部NR70，可摺式機身型到爆，可惜港版行貨淨得Cam型號，重要賣成四千蚊有多，拍住PocketPC個價，點買得落手。」世傑諗起都牙癢癢：「到最後雖然只係搵到部NR70（冇Cam型號）嘅二手機，不過賣價只係三萬幾日圓（約港幣$2,000），已經好滿足。」

其他筍貨推介
除以上港客掃貨例子外，其實重有唔少筍貨值得買，就如日本近年大Hit嘅DVD燒錄器，多款型號均大幅減價，相當抵買。另外呢兩年日本亦興起砌機熱，好多大路貨如CPU同記憶體都好平，其他如滑鼠、CD-R等配件直頭同深水埗黃金有得揮。

醒你兩招掃貨心得
1﹒Point卡傍身買嘢通行：
日本一向奉行Point卡制，即係申請該連鎖店之Point卡，便可將消費額之某個百分比以「Point」回贈，下次再幫襯時就可以Point代錢，買嘢變相有折頭。上年大多仍只係回贈10%Point，到今年為爭客已到16%至18%程度，現金結帳更會高達20%回贈㖭，特價品都可照用。過往並不接受遊客申請，到今日反而會主動向外地人士推薦㖭，雖然仍要填上住址電話等資料，不過港客大可不必理會，隨意填入資料就得。

2.中古貨屢有驚喜：
筆者到日本最鍾意就係勁掃中古貨（二手貨），最主要原因係乜都標示清楚，唔怕俾人呃。例如會標明機身花痕、屏幕死點、冇說明書等。絕唔會隱惡揚善，而且一般日本人習慣都好愛錫部機，所以大部份中古貨都好新淨。賣價吸引亦係主因之一，通常都係以新機五、六折開售，以咁嘅價錢買到九成新貨品，喺香港都幾難搵到。