歐寶車廠響今屆法國巴黎車展上，除展出多款新車外，同場亦展出咗一款名為ComboEauRouge嘅概念車，亦教在場車迷留有深刻印象。
ComboEauRouge外形雖保留原有Combo車系嘅神髓，但車身顏色就改用上藍、白、紅三色作主要色調，而且重改換上全新頭燈組合、跑車化頭尾泵把、17吋跑車合金胎軨、雙出式尾喉等等，從而令造型變得更具吸引力。車廂方面，廠方除為一雙前排座椅，改換上鮮紅色嘅桶椅配搭外，就連後排座椅及安全帶，都以鮮紅色作配搭，響跑車化嘅表板布局襯托下，一派跑車形象油然而生。機械配搭方面，ComboEauRouge就以一台1.8公升Ecotec引擎作動力核心，馬力輸出為125匹，用以驅動此車可謂綽綽有餘；而改用上17吋輪胎後，亦有助增強路面循迹性呢！