英國頭號萬人迷碧咸（DavidBeckham），近期狀態的確麻麻，成個幾月重未有波入，不過呢位靚仔依然有價有市！
就好似早排佢幫馬莎百貨設計嘅童裝系列「DB07」，雖然俾啲細路彈到一文不值，設計老套之餘又話打死都唔着，之不過，細路着嘅衫，係佢阿媽買㗎嘛！所以我大口羅拉前日睇番馬莎百貨公布嘅近期業績，佢哋嘅童裝零售額果然喺一個月之內升咗百分之十一！馬莎嘅發言人重點名讚碧咸嘅「DB07」童裝銷售情況理想，幫佢哋賺大錢，拉到唔少客咁話。所以話搵碧咸嚟冧師奶實work嘅！
除咗英國祖家之外，碧咸喺日本一樣掂，自從佢踢完世界盃之後，啲日本妹妹仔簡直當佢神咁拜！不嬲都係百事可樂代言人嘅碧咸，日前喺日本重出埋一套兩款、每支一百四十日圓（即係港幣九蚊）嘅「Pepsi×Beckham」珍藏鋁罐裝百事，聽講啲日本OL同學生排住隊咁買！