若然今個周末連續三日假期，未Plan定節目跟家人去玩的話，不妨考慮吓平治代理仁孚行，響中環添馬艦舊址舉行嘅汽車嘉年華會噃！皆因現場準備有多款啱兒童嘅遊戲攤位外，重有好啱車迷嘅平治車系展出。當中，除包括炙手可熱嘅新款E-Class、CLK同SL跑車外，重有衝着水貨而來嘅Facelifted新版S350同S500型號；雖然代理畀水貨車行飲咗頭啖湯，但佢哋亦不乏捧場客支持，事關買得起S-Class嘅人，響咁嘅時勢下絕對係非富則貴，車價未必係佢哋嘅主要考慮因素，反之會係新車嘅售後服務嘛！另外，最近若然你哋出入銅鑼灣區，或許會不時見到部迷你又趣致嘅Smart，響街道上穿梭來回，皆因亞Mark聽聞代理正為其進行最後測試。據知部Samrt亦有可能響周末跟一眾平治汽車展出，Smart主要分有Pulse同頂級Passion，同樣以一台600cc引擎作主打，前者硬頂版賣價不過13萬3千幾，後者亦係14萬7千多；至於電動軟篷頂型號，前者為15萬3千幾，後者亦不過16萬7千多咋！而Smart嘅專門店選址亦經已落實，喺邊？咪喺正雷諾Showroom對面，毗鄰賓利陳列室囉！
亞Mark剛啱收到消息，話寶馬代理上次以特惠價推售旗下520iA，賣個滿堂紅之後，嚟緊下星期三佢哋又會正式宣告以優惠價$369,950，推出2002年版525iA現貨，車價較前便宜5萬之餘，數量亦不過得50部而已，若然上次錯失機會的話，今勻就真係要行快步，去Showroom落Order喇！