既然高官要問責，噚日特首到立法會答問，議員急不及待篤啲高官背脊，鄭家富係第一個。佢提到交通費過高，但絕非篤環境運輸及工務局局長廖秀冬背脊，相反係為冬冬受到其他局長批評而抱不平，阿董就話政府內部有不同意見係好事。
第二個係馮檢基，佢翻樓市政策舊帳，指房屋及規劃地政局局長孫明揚曾經講過，政府冇水晶球，睇唔透個市，但𠵱家政府又高調話托市，馮檢基問政府是否已經「處理」咗孫公？議員哄堂大笑之餘，阿董亦笑住話：「你又想挑撥離間？」
話口未完，黃容根再「挑撥離間」，佢問阿董會否協助遠洋漁業，阿董反問佢有冇同官員接過頭。黃容根即「告御狀」，話衞生福利及食物局局長楊永強只回應過一句「冇得傾、不注資」，佢重問唔知情況嘅阿董會點「處理」楊局長。楊永強被人喺老細面前「摑一巴」，滿面通紅，身邊嘅李國章同何志平全無同情心，齊齊笑到反肚。又李國寶噚日終於同細佬李國章相遇擁抱，可惜八方手慢，㩒唔切相機，冇咗張靚相。
傳真︰2623-9278
電郵︰