地產商𠵱家都興搵個煞食賣點，或者吸引嘅宣傳主題，好似九倉碧堤半島，就係拉斯維加斯混合意大利風情，永泰亞洲陶源就賣貴族氣派咁。美聯可能見效果唔錯，噚日喺獨家代理嘅粉嶺嘉兆軒記者會，以英國貴族鍾意歎下午茶嘅休閒逸趣，作為主題，準備英式茶點，重請咗位英國淑女Zein嚟幫手招呼記者，介紹點解嘉兆軒洋名叫KensingtonGreen。
蘭西初頭有啲驚聽唔明，點知佢一開口就嚇人一跳，佢啲廣東話重純正過我。原來佢四歲就同屋企人嚟咗香港，小學重係讀普通嘅政府學校，難怪廣東話咁流利。重有中文名叫韋詩㖭。
講番樓盤個洋名，原來Kensington喺英國倫敦，有好多花草樹木，一直都有皇室嘅親朋戚友聚居，維多利亞女皇都住過。
大豐物業經理蔡仁輝話，嘉兆軒意向價每呎要二千六，三十個單位連四十五個車位，可套現八千萬。預收十多票。
住宅樓市氣氛低迷，好多人都睇唔通後市，各方專家之言，畀人嘅感覺都係老生常談。地產代理專業協會今個月25號舉辦研討會，都係講市道，似乎悶啲喎！
不過，蘭西收到料，利嘉閣董事總經理何紹章有新角度。佢哋會用五十年代至今嘅人口增長模式，推算樓市走勢。結論係04年開始，樓市會平穩發展，到07至08年，就會展開另一輪大升市。假如𠵱家入市，到時咪肥過肥仔！不過咁長遠嘅嘢，到時畀個官你做都得啦。
經濟不景，高檔品牌仍一擲千金積極擴充，名牌消費品代理商崇哲興業有限公司，啱啱租咗中環國際金融中心第二期商場多個舖位共六千呎樓面，售賣名牌子高檔貨，好似女行政人員最愛用嘅頭飾AlexandredeParis，廣為收藏家追捧嘅經典熊仔品牌Steiff，同M.I.Hummel瓷像等。
崇哲興業有限公司常務董事李少傑對蘭西講，看好中環國際金融中心商場發展潛力，估計兩年內可回本，旗下另一名牌Lalique待法國總公司審批後，亦會落實在該商場開店。
此外，名店詩韻早前在商場內開咗嘅LabelForLess（圖二），面積7000方呎，老闆娘康虞茱廸表示，生意每月以倍數增長，證明淡市也有生機，最緊要搵啱舖位，及對香港有信心。
銀主盤低價出貨，9月份達成232宗買賣，比8月多9%，重係2月以來新高。不過主要都係居屋，私人樓反而少咗。十五個私人屋苑有二十七宗銀主成交，減少13%。鰂魚涌康怡花園、藍田滙景花園及青山公路浪翠園都冇交易。
由於銀主貨放售盤源重係不斷咁增，𠵱家有4602個，二手業主又開始減價，拉近兩者距離，對銀主貨造成壓力。好彩近期市場氣氛好番啲，如果唔係，銀主想出到貨都幾難。
中原九龍住宅部以「外區」身份，推銷深井碧堤半島，竟然砌贏「主區」。九倉助理董事黃光耀噚日就請佢哋食晏，一姐劉瑛琳一行十人，要求黃光耀喺「碧堤半島卓越表現大獎」獎狀上簽名，以示確認。張獎狀會放喺海防道分行。睇嚟中記新界區要加把勁啦，贏人先要贏自己友。
房協為咗提高本港建造業水平，由舊年開始推出「優質工序」短片系列，到目前已拍咗二十二輯，重做埋光碟㖭。據房協刊物披露，最新六輯嘅內容係以電器、盪地台、假天花、油漆、冷氣機同泥井裝頂為主題。呢個「優質工序」系列一共包括三十三個工序，最後十一輯聽講短期內可以搞掂出街。
蘭西
電郵地址：