意大利球壇奧斯卡頒獎禮響禮拜一晚曲終人散，原來頒獎禮有段插曲，就係大會為咗搞氣氛，不斷以嬉笑怒罵手法寸人，結果被寸嘅光頭球證哥連拿同埋祖雲達斯球員拉隊離場，不歡而散。
鬼咩，主持人不斷攞球證偏幫祖記、祖記球員涉嫌嫖妓呢啲敏感嘢，同埋攞哥連拿個頭嚟講笑，睇嘅人梗係高呼過癮啦，難為當事人不知幾尷尬。結果哥連拿畀自己「紅牌」，同祖記職球員一齊怒氣沖沖咁離場，哥連拿好嬲咁話呢啲嘢唔講得笑，後來有人重話見到佢連個最佳球證獎都掟埋落垃圾桶㖭，呢層就唔知真定假嘞。
我求大俠覺得大會想改變以往嚴肅氣氛係好，之不過應該學下我哋中國人一句說話：崩口人忌崩口碗。
富咸會長阿法耶茲最近有新搞作，就係邀請球王比利做球探，喺巴西國內發掘好球員。我求大俠就覺得可行性不大，係人都知非歐盟外援要喺英格蘭攞張工作證好難，就算比利搵到好球員都有排煩啦！不過比利已經係「偉哥」等商業產品代言人，𠵱家連球探都掂，真係唔夠你撈！
講開列特被炒單嘢，好似昆尼啲老臣子就撐列特，之不過養緊傷嘅龍門蘇連遜就好似好贊成列特落台，話唔好就要變喎。我就覺得正在養傷嘅蘇連遜自己呢兩季都唔係打得好，冇資格話人，顧掂自己好過啦。
「黑貓」新特蘭炒咗列特魷魚之後，繼任熱門人選嘅格拉咸就講明對呢個三煞位冇興趣，佢強調只會考慮教一啲可以滿足佢野心嘅球會，咁講擺明睇唔起新特蘭啫，人哋班波已經士氣低落佢重講啲咁嘢，靠害咩？
世界盃之後踢到好沉嘅德國前鋒高路斯，日前話唔打算離開凱沙羅頓，希望再響球會浸淫一下㖭，我求大俠好欣賞呢個後生仔夠坦白，知自己未夠班踢國內大球會或者出國搵食，咁有自知之明，你有前途㗎。
逢周一至周五見報