美國總統布殊要求法院下令西岸碼頭工人復工，以維護國家利益，結果如願，令美股回升，但港股只處於好淡爭持狀態，而亞洲區內其他股市表現亦唔算好，睇嚟布殊即使搞得掂呢一劑，投資者對後市信心都係好有限，因為美國企業繼續調低業務及盈利預測。
電訊盈科（008）眨吓眼就跌到落0.91元收市，跌幅達5%，成交7651萬元。ｅ莉莎話諗極都唔明，電盈明明已經由高位跌咗95%以上，點解重有咁多貨沽，真係唔知何年何月至可以博反彈食胡？不過，電盈目前主要業務是固網加IDD，而IDD市場佔有率又跌至只有30%，失去支配者地位，雖則話可以在定價上更具彈性，增加競爭力，但另一角度睇則反映其主要業務被蠶食。
最近市傳電盈可能被剔出恒指成份股，但有人認為機會微，因為點都要畀面超人，不過唔知大摩又會唔會畀面呢？據聞有芬佬要求大摩踢電盈出大摩指數。
浩倫農科（1073）近期走勢疲弱非常，噚日大跌逾20%，毫無買盤承接，收0.61元。黑客話，呢排民企股重邊有人敢玩，近期唔少入市博反彈嘅朋友，全部都損手而回，情況同博電盈反彈差唔多。浩倫幕後炒家都唔知走咗去邊，完全冇人頂價，噚日連棚都費事搭。
市道唔好，連帶盈富基金（2800）銷情亦告轉淡，而中國電信更話明要調高派息比率，吸引投資者認購新股，完成上市目標，種種現象都反映投資者對大市缺乏信心。市場預期港府將公布挽救樓市措施，所以地產股近期較硬朗，但政府板斧有限，根本唔值得博。
阿虎