樂壇大姐大麥當娜（Madonna）套新片《SweptAway》聽日就會喺全美上畫，呢齣由佢老公基里奇（GuyRitchie）執導嘅電影，未上映已經劣評如潮，早排重話套戲喺英國冇片商肯要，差啲重要直出video，你都咪話唔樣炳！
雖則話娜姐冇演技就係人都知，但係我大口羅拉早排上網睇過齣戲嘅預告片，娜姐今次幫老公拍片真係瞓晒身㗎，一時要畀成碟意粉照頭淋，一時又要喺海灘上面同個男主角玩「泥漿摔角」，重要俾條八爪魚非禮！計我話佢老公慌唔係以拍戲為名，整蠱隻老虎乸咩！
不過我大口羅拉最近收到風，話有個美國演員話嗰套《SweptAway》嘅古仔，其實係佢嘅idea，佢重向法庭申請禁制令，要阻止套戲上畫，不過美國法院啱啱宣布佢嘅禁制令無效，所以娜姐同佢老公總算鬆番口氣。