司徒拔道「迷你豪宅」摘星閣，果然盤如其名，係聚「星」之地。近排發展商趁物業屆現樓，再度促銷。聽講上周就有兩個靚女明星先後駕到去睇樓。其中一位係陳法蓉，同爸爸一齊去睇樓，聞說佢爸爸鍾情地下連花園單位，可能鍾意有地方可一享種植之樂啩。呢個地下連花園單位，貨量唔多，重有六個，793呎，但就有四百幾呎私家花園。
另外，有打女之稱的呂少玲，上個禮拜黃昏同媽咪去睇樓，好似鍾意頂層連天台單位多啲，貪有私人空間啩。個區假假地都算豪宅區，對面係跑馬地，隔籬東山台，隱藏唔少星級人馬，加上環境夠寧靜，可免「狗仔隊」騷擾，自然受明星鍾愛。
愈嚟愈似大細路咁好玩貪食嘅恒基張炳強，噚日為慶祝中原黃埔新舖開張，專登喺附近嘅蔡瀾美食坊買咗一大盤嘅麥芽糖夾心餅請大家食。
佢話已經幾十年冇食過，實在太緬懷，同埋嗒落實在太好味啦！可能新地周國賢同佢屬同一年代，大家有同樣的記憶與情懷啩，周sir一嚟到，就即刻嗌住要食，重食唔停口，連𡁻兩件先至為中原個舖做開張剪綵同開香檳，簡直同張生好似對活寶貝。
九龍倉嘅深井碧堤半島賣咗一段時間，成績算唔錯，又到咗代理慶祝嘅時候。香港置業喺十月份主管會上，特別頒銷售策略大獎畀有份參與碧堤嘅主管，送咗支三公升紅酒畀發展項目部區域副總經理黃德華，等佢同下屬分享。
而九龍豪宅區經理馮智賢同發展商項目部副區經理梁偉明，都攞到支細嘅。港置董事胡日發話，公司喺碧堤嘅碧海連天、內購同公開發售都做到首宗成交，梗係要慶祝下。支紅酒原產地係意大利，配合番碧堤嘅意大利風情。
另外，入行已十六年嘅丘岳鋒，一年前加入港置，今年3月升為康怡分行經理，𠵱家再升做港島東區經理。佢嘅代表作係同前線同事，喺八日造成七宗聖佐治大廈成交。
裕景興業持有天后地鐵站對面嘅英皇道十四號一樓，約萬二呎商場，改名為「天后蘋果商場」。據代理華匯物業陳國雄講，共間咗十九個舖，以賣潮流嘢為主，大部份約一百到一百五十呎，月租都係三千到六千幾蚊，包雜費同推廣費。個舖之前由東東雲吞麵使用，都係裕景旗下嘅生意。
中環花旗銀行舖皇上月尾截標，共收約10份標書，標價由一億五千萬至二億元，仲量聯行、第一太平及喜來登旺舖代理均有代客入標。
熱心人士向蘭西報料，多名富豪對舖皇均感興趣，其中資深地產投資者楊受成更以私人名義入標，提出嘅條件重好接近業主要求。
根據標書，最遲會在本月15日公布，現階段正等待美國總公司批核。個舖花旗銀行喺83年，以九千萬元向會德豐購入，今次將會售後租回，月租一百二十五萬元，若以二億元成交，租金回報率有七點五厘，有咁夠實力嘅租客，回報又唔低，難怪富豪們都動心。
發展商𠵱家賣樓都好着重包裝，除咗花唔少精神拍廣告外，重學咗內地樓盤，請唔同類型嘅專家或藝術家幫手推介。其中永泰亞洲就請攝影大師杜可風，為九龍塘陶源拍咗輯連環圖，以展現「大戶芳華」主題。
發展商之中，論反應快，長實都算數一數二。每次行家有賣樓新動作，長實例必唔輸蝕，出招截擊，好似攝石人咁，增加曝光率。
今次新地準備推將軍澳中心，長實就話準備明後天，派出數十名置業精英於將軍澳地鐵站附近撈客，推介泓景臺同埋傲雲峰。而長實重列舉將軍澳未來有逾三萬五伙私樓供應，實行令買家睇到心寒，轉投他區為止。
香港幾乎日日都有拍賣會，原來台灣都不時有此舉，今個禮拜六又有一場，重係由香港人熟悉嘅戴德梁行負責，共推出41項物業，分布喺台北縣同桃園縣。
台灣拍賣物業同香港好唔同，唔單止有底價，重有市價畀你參考。另外，去參加拍賣，唔係行入去就得㗎，要帶埋身份證明文件，印章同新台幣六萬蚊本票，咁就一定唔會出現香港黃月鶯事件啦。
蘭西
電郵地址：