恒指早跌晚穩，最後打和收場。大隻嘢中，中銀香港（2388）最出色，收7.85元，升30仙。個市交投淡靜，個別股份有啲錢掟落去，股價即刻有唔細變化，例如中銀，成交金額不過1億元鬆啲，好似唔細，其實非常有限，7月招股，收錢已經係2百億元，𠵱家1日嘅成交金額，只係當時集資嘅幾個巴仙。
中銀郁，啲中銀Call輪受到帶挈。9459一升就係46%，9456升38%，9458升31%。呢幾件Call輪，槓桿率夠勁，發揮放大效應，升起上嚟自然爆炸好多。
中銀Call輪，最實際係9462，明年7月到期，現價10.5仙，溢價6.1%，槓桿率7.5倍。比較其他中銀Call輪，9462波幅冇咁大，但溢價合理好多，買賣亦易好多。壽命長，溢價冇蝕底。想穩穩陣陣博中銀緩步向上，9462可以揸得安心。
死火輪排第2嘅係運輸籃子Call輪9257，收8.5仙，跌26%。成份股有駿威（203）、滬杭甬（576）、華晨（1114）、慶鈴（1122）。隻輪溢價13.6%，槓桿率14.6倍，重有個半月夠鐘，博成份股呢段日子耐有近1成4升幅，唔係咁易，隻輪睇嚟繼續死火。
章盛