國際賽屢獲殊榮嘅「風之后」李麗珊身體不適，連亞運金牌頒獎禮都唔去，就飛返香港，究竟佢嘅病情係點樣，相信香港讀者非常關心。珊珊出事後至今仍未開腔，在此，小記希望珊珊開口第一句，就係：「我重得嘅！」
李麗珊今次因病神秘返港，滑浪風帆會為咗唔畀傳媒採訪，影響珊珊休養，事前保密工作做到足，上至風帆會會長和領隊，下至教練和運動員，各人對珊珊行蹤守口如瓶。直至「珊珊」噚日香港時間下午兩點飛抵香港國際機場，並經秘密通道離開後，風帆會先透過港協發新聞通知予各傳媒。
作為新聞工作者，會方咁嘅處理方法當然好令小記失望（因為冇得交差），但作為珊珊嘅朋友，小記亦好明白珊珊目前需要係休息，而唔係傳媒貼身追訪。
因為比賽和訓練，珊珊在外地逗留嘅時間重多過喺香港，所以小記希望珊珊今次只係「小病是福」，在香港休息幾日檢查身體，之後可以再戰江湖。