趙飛雲近排唔多夠氣，馬季開鑼以來，好多次由贏變輸，其中有5次3重彩，影相爭第3名輸個短頭，真係窒住條氣，但估唔到連炒股票都係咁。周二晚睇住美股跌至7331就展開反彈，尾段高見7622，最多升過200點，心諗今次入市博反彈時間啱啱好，可以食番鋪靚胡，點知最後一粒鐘，杜指大幅回吐逾百點，最後只升78點，收7501。杜指日線圖由大陽燭變成陀螺，真係唔使轉都暈。
港股噚日反覆靠穩，恒指收8977，微跌0.06點，可以當係平收。恒指Call輪9552尾段發力，微升1個價位，收0.203元，似乎唔少人同趙飛雲睇法一樣，認為大市會先反彈，事實上，美國著名技術分析軟件MataStock周二亦發出買入訊號。
恒指噚日應升唔升，觀望氣氛濃厚，其實有幾個因素影響：1美股周二晚走勢，令人感覺反彈力度唔夠；2日股下跌169點，創19年新低；3中國聯通（762）母公司A股上市首日僅升24%，低於市場預期及後市看淡，影響電訊股走勢；4美軍在科威特遇襲一死一傷，不利中東局勢發展。
不過，從技術角度睇，中移動（941）及新地（016）升近20日線出現阻力回吐，十分正常，只要守穩支持位，整固完畢可再向上試關。
另一較好迹象是長實（001）及和黃（013）終見反彈，若滙豐（005）亦突破80元阻力，恒指先上試20日線阻力（現處9309），機會仍大，所以繼續持有9552。
趙飛雲