十月六日星期日輸馬輸到頭擰擰，第九第十場以為靠「明太祖」、「飛象過河」一口孖寶可以救吓命，點知都衰埋，幾乎清袋離場。散場後撞到肥仔雄，佢話是日專買五號獨贏、位置，贏咗少少，既然好耐冇見，可以請左丁山飲杯、食晚飯咁講，於是帶佢去沙田會所二樓吉澳吧，再到凱旋廳食飯。喺吉澳吧碰到練馬師胡新與一位老人家，個樣有幾分似方祿麟，大概係親戚啩，點解胡新贏咗兩場，都唔見有乜笑容嘅？反而在凱旋廳見到希斯、戴勝等成班人，興高采烈，希斯兩隻馬「紅旗飛揚」、「贏得妙」臨場猛落飛而大敗，對希斯心情完全冇影響。
肥仔雄話自從九月七日聽沈振盈「投資Show」講八字測馬，話明當日旺二、五、八之後，佢就覺得既然啲報紙貼士冇個準，不如信吓「冧巴」，碰吓運氣，十月一日三T爆冷，但仍然有八點五注中，每十蚊派七百幾萬，肥仔雄聽到呂健威馬房有一個馬主福至心靈，每關買一、二、八、九加另外一個冧巴，每關五隻，三關共一千注，二元一注，二千蚊投注就贏咗近百五萬。肥仔雄喺十月六日頭三場都有五號跑出嚟，發覺五號好旺，於是由第四場開始跟風買五號WP，竟然中咗第四場「好運王」，第五場「旅英翹楚」，第九場「顯顏色」，第十場「心願」，全部都有分頭，笑到唔識得出聲。肥仔雄話：「有冇辦法事先知道開邊個冧巴，等我買定WP過關呢！」有早知就發達啦，不如叫沈振盈唔好講股票，專講賽馬冧巴啦。