近年MPV大行其道，本田Odyssey同萬事得MPV響香港亦有一定捧場客；查實，日產除Serena同Elgrand外，兩者之間重有一款Presage車系，惟普及性卻有好大差異。為要吸納呢類中型MPV嘅用家，日產車廠計劃響明年7月，推出全新第2代Presage車系，尺碼較上一代擴闊至4800×1800×1750mm，令車廂空間來得寬闊之餘，引擎容積亦由原來嘅2.5公升，增至3.0公升V6偈，僅保留原有三排七座位及八座位組合。據知，香港代理早前亦曾考慮引入跟Presage相近嘅Bassara抵港，以抗衡本田Odyssey，𠵱家前者有新車款推出，唔知代理又會否納入考慮之列呢？
眼見本田Mobilio同豐田Spacio（即港版CorollaVerso）嘅成功，日產除推出全新一代嘅Cube城市小車之餘，現正計劃響明年下半年，生產一款變種自Cube嘅迷你七人MPV。新車長度及闊度較原車伸延之餘，佢重有一個全新短鼻嘅車首組合，兼且有兩邊趟門設計，以方便乘客上落。
至於動力心臟跟Cube同樣用上一台1.3公升直4DOHC引擎，三排座椅間有Walk-through嘅方便之外，中、後排座椅重有摺叠平放嘅特點，大有客貨兩用嘅好處㗎！