六歲的安仔，因為患有脊髓肌肉萎縮症（簡稱SMA），導致雙腳肌肉退化，不但未能走動，就連站起來的氣力也沒有。剛升讀特殊學校的安仔，盼望擁有一部電動輪椅代步，惜單親媽媽楊太無力替愛兒添置，亟待善長援手。
當安仔還是一歲多的時候，他猶如一隻甩繩馬騮，終日最愛蹦蹦跳，可是自兩歲開始，一切都改寫了。「喺安仔兩歲嘅時候，我發現佢成日跌倒、企唔穩，最初都唔知乜嘢事，後來醫生終於證實佢有脊髓肌肉萎縮症，只不過係短短幾個月，安仔對腳已經退化得好快，最後連一步都行唔到。」楊太向記者述說安仔病發的經過。
這幾年來，安仔因不敵病魔，多次進出鬼門關，全賴母親不離不棄，衣不解帶地照顧，才能化險為夷。「醫生好坦白同我講，佢嘅情況只會一路差落去，唔會有乜嘢奇迹，叫我要有心理準備，但安仔係我個仔，我點都唔會放棄，一定會照顧佢到最後一刻。」
記者看着靜靜坐在一角的安仔，足滿六歲的他，身材瘦削矮小得活像三、四歲的孩子，惹人垂憐。記者問校園生活是否快樂，他只點點頭，但想了想後又補充：「有少少唔開心，因為我冇電動輪椅。」
剛升讀特殊學校的安仔，現倚靠醫院借出的手動輪椅代步，惟因為小手臂的肌肉亦開始出現退化，操控輪椅倍覺吃力。「我對手有時會唔夠力，上斜路好辛苦，我又唔鍾意呢部輪椅要用手推，搞到對手好污糟，所以好想有部電動輪椅。」安仔扁着嘴說。
然而，對於兒子的心願，楊太坦言無力達成。「𠵱家幾仔乸連開飯都唔夠，又邊有本事攞三幾萬蚊出嚟買電動輪椅吖！」
育有四名年齡分別六歲至九歲子女的楊太，年前與丈夫離異，因為患有精神抑鬱及肩周炎，加上要照顧患病的么子安仔，無法外出工作，一室婦孺暫靠綜援金生活，經濟十分拮据。「雖然安仔個病冇得醫，但我都唔想佢惡化得咁快，所以𠵱家我日日都畀安仔食藥，呢筆使費都好大，加上燈油火蠟、幾個細路哥返學嘅錢，我哋份綜援真係用到一毫子都冇剩。」
一臉憂心的楊太，惟盼善長伸出同情之手，資助愛兒購買一部電動輪椅。「我睇見佢𠵱家推輪椅都好辛苦，好似唔多夠氣力，希望大家可以幫吓安仔。」楊太由衷地呼籲。
捐款編號：C0710
脊髓肌肉萎縮症SMA（SpinalMuscularAtrophy），可簡稱SMA，是一種腦內科遺傳疾病，每一萬人中便有一人患上。
由於脊髓內控制運動神經的前角細胞退化，引致肌肉萎縮，但不會影響大腦的認知能力，患者大多擁有正常的智力。而根據發病年齡及病情，SMA可以分為嚴重、中度及輕微三類，嚴重者可能會有生命危險。此病至今尚未有根治方法，惟患者若得到適當的照料，可減輕病情惡化的速度。
暖流熱線
電話：29908688
傳真：23702192
電郵：
網址：