張國榮當選模範司機？真唔真？真！不過，此國榮不同彼國榮，佢唔係歌星，只係噚日在「埃索美孚精明路路通」模範司機至尊大獎中，勇奪銀獎嘅嗰位龍運巴士嘅車長。至於金獎則由新大嶼山巴士夜更車長駱志強奪得。
三十位得獎司機噚日出席頒獎禮，分享安全駕駛心得，多數話關心乘客最重要。其中金獎司機駱志強同乘客親密如家人，佢口中嘅大嶼山真係人情味滿瀉。好似有晚一位女居民抱住發高燒嘅BB上車，雖然，駱先生揸嘅巴士唔經醫院，都特登載佢哋去。
駱生重記得所有熟客下車地點，但仍會問定遊客去邊，以免乘客一旦瞓着過咗站，就要等兩個鐘先有下班車。咁細心體貼，抵佢哋攞獎嘅。
（圖）模範司機金獎得主駱志強（中）及兩位銀獎得主張國榮（左）、劉偉明（右）。
傳真︰2623-9278
電郵︰