Dior、Gucci、Hermes、LouisVuitton……全部一折起！講緊並非月下倉底貨，而是二手SecondHand時裝。年輕一族接受能力高，日本古着大行其道，但主攻O.L.至愛的貴價名牌時裝，香港又似乎無乜幾間舖。賣名牌袋賣到開巷的米蘭站，銅鑼灣旺區新店專賣二手名牌衫，開業一個月日日人頭湧湧。買名牌着靚衫，始終係女人的終極任務，經濟唔好，平民價的名牌二手衫，分分鐘會殺出一條血路！
記者：梁珮瑜 攝影：陳穎、梁珮瑜
開業不足一個月的米蘭站賣衫店，日日人頭湧湧。拍攝時是OfficeHour經已頗迫人，下午5時後的黃金時段更加針都插唔入。
拍攝當日除了多人掃貨，亦見不少人來到放貨，其中更包括日本人。一位熟客Fiona當日亦帶同四件名牌衫來放貨。店員Check完衫再問埋老闆就即時報價，Fiona同意「收購價」後交易即成，過程唔使五分鐘。
賣二手名牌袋賣到有幾間分店，上月米蘭站再下一城，於銅鑼灣旺地開設二手時裝專賣店，方式與賣名牌袋同出一轍。店舖負責人Keith：「我們首創現金收衫，睇啱即時畀現金收買你件衫，價錢會視乎牌子、款式及新淨程度而定。」咁現時最值錢又係邊個牌子？「五大紅牌有LV、Dior、Gucci、Hermes及CHANEL，另外有幾個熱牌都好賣得，如Marni、MarcJacobs、Chloe、DriesVanNoten及TumoriChisato等。」
據負責人透露，不少名牌衫貨源是來自名媛闊太及藝人，新衫通常着一次就會放貨，此類二手衫都頗為新淨。以下揀選的筍貨款新又襟興，實屬精選推介。
店內有大量女士返工套裝有選擇，包括Gucci及CHANEL等紅牌。而這套LouisVuitton米白外套連半截裙套裝，用料正剪裁靚，是O.L.必選的襟興款式。正價$10,400，七成新淨二手價$4,990。
Twins及袓兒等女星都愛的HystericGlamour，普通T恤動輒過千，嫌肉痛不妨買二手，牛角袖衞衣原價$1,800，八成新淨售價$690。
由B嫂力捧的Voyage正價貴到飛起，要扮高貴有氣質，亦不妨考慮這件二手絲絨外套，正價$7,980，八成新，二手價$1,980。
Chloe近年成大熱牌子，副線SeebyChloe價錢較平亦更年輕，而店內首選這件襟章牛仔褸，原價要$3,900，二手售$1,590，有八成新。內襯MonahLi吊帶背心，原價$1,680，七成新淨價只賣$390。
ChristianDior的T恤價錢唔平但季季成搶手貨，6字背心Tee原價$2,000，七成新的二手貨售$290，抵玩！而印花CELINE牛仔褲原價$2,000，二手只售$390，八成新淨重抵過買雜牌。
店中亦有不少男裝名牌貨，恤衫、針織、外套及長褲，款式多選擇。這件Gucci真皮型仔Jacket，有幾分似木村拓哉那件Ape，原價要$23,000，八成新賣$5,900都算抵！
不論長短，男裝恤牌子選擇多，值得推介有HugoBoss、IsseyMiyake、Prada及Gucci等。如這件VivienneWestwood恤原價$1,790，七成新二手價只售$590。
米蘭站新舖分上下兩層過千呎，比二手袋店裝飾更正更闊落。
（銅鑼灣波斯富街53號地舖?28381618）