打工仔都好怕「失業」呢兩個字，不過英格蘭球圈就有一個人例外，一於將「失業」當係「放大假」，重威到想幾時有工開都隨心所欲，講緊嘅就係前列斯領隊奧拉利。
今季英超聯開咧前，我哋《蘋果日報》就走訪過奧拉利，記得當時佢話希望唞吓先，唔急於再執教鞭住，到十一月左右至復出都未遲。又真係畀佢講中喎，新特蘭嘅列特就響前日成為首位被炒領隊，睇嚟奧拉利真係可以如期響呢個時候復出。
又難怪佢嗰陣咁老定嘅，幾乎每季英超聯響季初都總會有某幾個領隊要食「豉椒炒魷」㗎啦。我求大俠就覺得，奧拉利再睇定啲都未遲，若果嫌新特蘭位處東北地方偏遠，首都倫敦市啱唔啱心水？韋斯咸個領隊位都可能等緊你㗎，重有……！
前晚英超聯曼聯主場對愛華頓，其中一位陪同球隊步入球場嘅「幸運星」小女孩卡麗莎，可能因為奧脫福球場坐滿六萬幾人，以及打夜波天黑嘅關係，入到場之後就受驚而喊起上嚟；「萬人迷」碧咸見到咁樣，即刻上前𠱁番佢笑，咁有愛心，抵佢最後帶領曼聯贏波啦！
韋斯咸門將占士繼續入選英格蘭大軍，雖然周六作客對斯洛伐克時未必有得正選上陣，但係佢𠵱家響國家隊嘅作用就好大嘞！原來呢位三十二歲門神屋企有個斯洛伐克籍嘅女傭，占士重話可以響佢身上探聽多啲有關斯洛伐克嘅情報，打唔到正選都可以做「間諜」，認真搞笑！
釜山亞運玩到下星期一至閉幕，不過，本地甲組聯賽等唔切要喺聽晚開番，重係三日內踢五場，係咪真係要咁急先？我求大俠有時都唔知足總點編賽程，明知亞運重玩緊，各大體育版嘅篇幅有限，既然足總成日講想報紙寫多啲本地波，點解佢哋唔等多幾日，等亞運完晒先開呢，冇度清楚就編，實在抵鬧！
「躁狂人」史比維爾噚日俾紐約人罰咗二十五萬美金，原因係佢整親手之後，過咗十日先知會球會；而史比維爾死話自己整親手嗰時唔知咁「大鑊」，要照X光先知骨折喎。咁大個人唔係連自己斷骨都唔知呀，慌唔係佢整親之後博趕得切響集訓營開鑼之前好番，點知奸計不成，先死死地氣講畀球會聽咩。