楊特首喺瀋陽被扣留，引起中環議論紛紛。楊特首做事太揚，作風海派過海派，連金正日都搞得掂，重呈獻金正日花，真乃曠世天才也，為國增光，唔知荷蘭女王會唔會頒個爵士勳銜畀佢。中國當局竟然老實唔客氣，扣查北韓特區特首，唔照顧荷蘭人民嘅感情，唔知北韓、荷蘭兩國駐北京大使有冇遞抗議信呢？
楊特首唔掂，歐亞農業呢隻股惹人疑竇，中環亦有人冇癮，皆因楊特首早已約定一班夠闊夠豪嘅大佬去新義州參觀考察，共商搵錢大計，開賭場、開營娛樂場所等等，人人滿肚密圈，預備將新義州搞成中國韓國靚女嘅集中營，𠵱家楊特首入唔到閘，全部計劃要拖住先。
中貿T過去兩年都踎響東北，最近先至完成服務合約返嚟香港。我哋問佢有冇見過楊斌、歐亞農場、農場產品，中貿T話：「最弊有個左丁山坐響度，唔敢講太多，咁講啦，我去過，我見到農場有個鐵架……」（下刪腦袋記憶體裝載嘅三百字。）」
如此說來，點會被追稅一千萬人民幣呀？哦，中貿T知道左丁山好笨，於是點到明：「上市噃，冇利潤騷出嚟，唔得嘅。」中貿T話中國民營企業有好多天才，玩財技魔術叻過大衞高柏飛，香港商人拍馬都追唔上。高祀仁叫人「老老實實做人」，香港人唔使聽佢講都已經「老老實實做人」，所以先至對楊特首拍案驚奇啫。