無論部手機有幾「硬淨」，或多或少都總有毛病，坊間有不少舖頭提供手機維修服務，究竟近期有邊部手機維修率特別高？今日就找來有6年手機維修經驗的專家阿Kent，數數近期十大至Hit維修問題，原來Nokia嘅8310排榜首，可能因為呢部機人氣夠，多人用亦自然較多人要攞部機去維修！
記者：恭尚恩 攝影：陳偉強
極有興趣研究機械的阿Kent從事手機維修工作差不多有6年時間，大至電視機，細至MD機都素有研究，至於選擇手機維修的原因，因為5-6年前手機維修非常冷門，好少人從事呢一行，而且手機是日常生活用品，壞的機會亦會較多，於是在眾多細件的產品維修選擇了手機。至於當初入行同現時的最大分別，是當年有較多人願意花金錢去改裝手機如加閃燈或換殼噴顏色，家陣就維修佔大多數，或者經濟差，手機有問題寧願用一百幾十整部機，而唔會隨意買部新機。
近日有報道指出，部份坊間維修舖會將手機的原廠配件甚至將整塊底板換去，令用家對坊間維修服務大打折扣，其實以這種手法經營的店舖只佔極少數，若然想拎部機去坊間維修舖但又唔多放心，阿Kent就建議用家不妨幫襯相熟舖頭，或者喺底板唔多覺眼地方做記號以作識別，又或者幫襯專門做維修而且舖內有齊工具的店舖。
手機用得耐外殼變殘舊，零件亦會因老化會出現聽筒好似變得細聲，或者屏幕的導電膠損壞令屏幕顯示時有時無，但因為些少問題將部機擺埋一邊唔用又未免可惜，倒不如將部機翻新，好似將8210加大聲、改白燈、換導電膠及換個B殼，逐項計加埋要$220，全套做齊就只需$148，翻新之後自己唔用都可以留畀父母用，就算拎去Trade-in價錢都可以高些少。
8310包辦頭一、二位，當中就以自動熄機及Hang機最常見，歸根究柢是軟件問題，尤其是使用舊版本如V04.53或以前軟件版本的8310就最容易有呢個問題出現，首批應市的8310就通常用舊版本的軟件，所以使用呢批手機的用家亦最常遇到自動熄機或Hang機，解決辦法就是更新軟件。
軟件問題亦同樣出現於佔第三位的三星N620，但並非因新舊版本的不同，而是可能因以水貨英文機改為中文機或利用電腦軟件輸入鈴聲的過程中，影響到手機原有的軟件所致。
具備防水防震防塵三防的5210，唔代表可以點撞都得，部份用家可能誤會了防震等於可以任撞，減低對手機的愛惜程度，以為部手機點撞都無問題，最終因撞擊而造成爆芒的情況就經常出現在5210身上，若然出現少許裂紋亦尚可接受，但情況好似圖中的5210咁嚴重，就非換屏幕不可。
音量鍵齊齊斷
無獨有偶，SonyEricssonT66及T68/T68i的音量鍵同樣因好容易斷而需要維修，可能音量鍵是以向上下推的方法來控操而非一般的按鍵式，所以經常使用並過份用力就容易令音量鍵折斷。
韓國SEWONSG2000/SG2200之所以唔着機，大部份原因都是因為底板濕水，或者機身細袋喺褲袋去廁所時唔覺意跌落水。其實同樣問題並非只發生在SEWON手機身上，其他品牌如Toplux或Capitel所推出的細摺機都有因為底板濕水導致唔着機需要維修，不過個案就唔及SEWON咁多。
百利科技
地址：旺角先達廣場1樓F88號舖
電話：27700027