山頂種植道73至77號（圖一）三幢貴重豪宅，件件過五千萬，但不消三個月就清晒貨，有代理話個盤咁好賣，係因為每間屋都有個獨立靚冧巴，夠晒尊貴獨特，啱晒富豪嘅要求。
原來該地前身叫種植道57號，發展商永傑集團購入後計劃起三座大屋，但一個冧巴唔夠分，於是申請改門牌，成為現時三間獨立冧巴大屋，永傑陳澤儒果然了解富豪心態。
更改街號係由差餉物業估價處負責，重一毫子都唔使畀，條件只係個冧巴無人用緊，而又順序合理，即要配合隔籬左右嘅街號。
過去原來唔少發展商或業主都曾經改過門牌，如田北俊嘅山頂白加道十四號豪宅，諧音「實死」，唔係幾好意頭，於是改為十二號。又如九龍倉位於賓吉道及種植道交界嘅新盤，就成功申請改為種植道一號，個名夠豪又夠晒響，以前叫開嘅賓吉道22至24號又或者係HillviewCourt，就通通抹晒佢。
𠵱家買內地樓，發展商有好多嘢送，好似深圳布吉嘅茵悅之生花園，今個禮拜六喺香港展銷，買家除咗有折扣優惠外，重可獲贈摩托羅拉V70型號手提電話。
個盤第一期約有五百伙，由646呎兩房到1399呎嘅五房都有，售價由十零萬起。至於頂層skyhouse，樓底有22呎高，重用威盧克斯窗，話係世界名牌子喎！
產業署高級公務員宿舍，一向租得唔錯，但第三季僅租出三成三，主要由於私人住宅租金回落，令公務員宿舍吸引力大減。
不過，利嘉閣招佩貞話，有啲仍然旺租，好似薄扶林碧瑤灣及琵琶山郝德傑道單位，一兩日就租出，皆因特平。何文田衞理苑（圖二）七個單位租出五個，另有一個就收番。
其實產業署喺第三季都減咗四次租，結果成績都係咁。私樓租金重跌緊，睇怕產業署都要嚟次大劈價。居屋被批評話搞到私樓「雞毛鴨血」，估唔到公務員宿舍，就畀私樓打謝。
地鐵調景嶺站上蓋發展下星期尾截標，蘭西聽到九鐵已經磨刀霍霍，諗住等地鐵截標後，就攞火炭何東樓商住項目出嚟招標。早幾個月政府批出該項目大約二十三億元補地價，每呎樓面要成千七蚊，九鐵認為政府喺建築成本上計少咗好多，唔制兼要上訴。
聽講最近雙方已經傾掂數，就快有新價，蘭西諗點減都要十六億以上啩，即每呎千二蚊左右。由於兩鐵一局之前話大家會協調推出項目，今次九鐵都會跟足規矩，最快本月下旬先攞出嚟。何東樓項目建五幢住宅，調景嶺站則有九幢住宅，分兩期起。有興趣嘅發展商不妨諗諗，兩個鐵路上蓋項目任揀。
長實喺北京嘅東方廣場商場「東方新天地」，喺國慶假期有過百萬人次。睇嚟內地人消費能力不容忽視，只要有一兩成人花錢幫襯，條數都唔得了。
蘭西
電郵地址：