「舅父，禽晚有冇睇乳鴿？」外甥問我。
「咩乳鴿？禽晚無端端邊度搵啲乳鴿嚟睇？」有如丈八金剛的我，唔明問乜嘢。
「唔該咪咁為食，我係問你有冇睇意甲，意大利甲組足球聯賽？」
意甲、西甲、德甲、法甲、英超，加上歐冠盃，每個禮拜幾十場球賽，幾乎每晚回家後的休息時間都奉獻給了觀賞足球。
以往只對英超聯的賽事感興趣，因為除了賽事緊湊之外，兩隊班霸：曼聯與阿仙奴之爭也真夠瞄頭。今屆的曼聯表現得頗不對辦，尤其有個別球員越踢越有點娘娘腔，每有波掂腳便第一時間傳球，仿似怕了敵隊前來剷腳，斷腳事小，整亂個頭事大。
阿仙奴在雲格的領導下，正式成為一支法籍黑人球隊，主將亨利大熟大勇，策劃戰術與射球都信心十足，如果唔係有心放水的話，應該季中就可以捧定隻盃。
利物浦的奧雲無端端未老先衰，踢不出水準，新外援亦未能融入球隊，布力般的黑雙煞已不復當年勇，列斯聯的兩名新老虎仔則表現得很不穩定。相反西班牙的皇家馬德里則粒粒星，本來已經有施丹、魯爾、費高與卡羅斯，最近大灑金元買埋朗拿度，真係似係一隊明星足球隊多過似球會。
人哋使咗咁多錢，點好意思唔捧場？麻煩以後有皇馬踢波的夜晚，大家唔使約我去街。