電盈（008）前日跌破1雞，昨日成為好多張報紙嘅內版頭條新聞。股價昨日再跌，得番96仙，唔見3仙，又創NewLow。
有報紙計過數，話小小超好慘，名下嗰批電盈由高位起計，蒸發1400億。真正慘嘅係小股東。小小超喺99年重係「1168得信佳」時代，做大股東，每股成本只係30仙（6仙，然後5股併1），𠵱家重賺緊價220%。另外，小小超喺00年秋，十五六蚊曾經減持，有啲銀両袋袋平安。小股東做咗鹹魚，大股東耐唔中則食吓白灼新鮮螺片，呢味貴嘢真係「好爽」。
電盈10隻Call輪，差唔多全部都係1仙貨色，最長期嘅係明年5月夠鐘，最低行使價係1.80元。都唔使點計，呢批Call輪去到尾都係清一色香晒。電盈有兩件Put輪9136同9421，喺電盈下跌過程中係搵銀對象，不過槓桿率細兼冇乜成交，估中電盈下跌都冇用。
昨日跌得最勁嘅係聯想Call輪9380，由8.9仙散落1.2仙，冇咗86%，雖然正股（992）由2.25元彈上2.425元。
9380有70萬份成交，雖然溢價一啲都唔低，但始終明年2月先至到期，個幾仙當買1個夢，諗得過，當然要準備輸晒，好彩輸晒都無傷大雅。
章盛