林曉峰同佢個新女友康子妮拍拖唔夠一年，早排已經有傳洪天明送HelloKitty電話袋畀康子妮，向女方大獻殷勤。
雖然洪天明對女仔一向細心，但佢嘅HelloKitty攻勢似乎未能夠攻陷康子妮嘅芳心，周日凌晨狗仔隊記者就喺跑馬地撞到康子妮同林曉峰拍拖食消夜，兩個人重叫到一枱都係食物㖭。
呢對小情人周日凌晨喺張堅庭開嘅「表哥粉麵專家」茶餐廳撐枱腳。雖然係凌晨一點幾，但佢哋就好好胃口，兩個人食消夜叫咗好多嘢，包括淨雲吞、淨魚蛋、淨豬手、混醬多士、凍杏霜同凍檸茶，埋單一百三十一蚊。估唔到佢哋喺半夜三更都咁擦得，但小心會變肥仔肥妹呀！
蔡安蕎前晚去咗灣仔會展睇新片《特務踢死兔》首映，佢着咗件淺黃色嘅上衣。不過當蔡安蕎側身影相時，出現咗迫爆鈕扣嘅情況，頗為性感。
蔡安蕎話：「我暑假時去玩滑浪板，覺得好好玩。我遲啲重會上堂學揸船同考船牌，到時可能會買架二手快艇，都應該唔會好貴。」
蘇永康早前去台灣接受勒戒，但至今都未獲台灣有關方面簽發工作證。台灣傳媒噚日向新聞局長葉國興查問，佢用國語話：「外國人在台灣犯法危害風氣，所以拿不到工作證，我們對蘇永康並沒有偏見，同樣道理，台灣人在外國犯法，一樣申請不到工作證，至於期限到何時，就真的不知道。」
方力申噚日喺尖沙嘴美麗華酒店出現。方力申參加完釜山亞運，雖然佢同隊友參加接力賽只得第六，但時間就破咗香港紀錄，所以佢畀自己九十九分。佢嘅緋聞女友李彩樺被傳甩拖，重有雜誌影到林峯去的士高識女仔，方力申話：「都唔知係唔係嘅，由『峯樺戀』傳出開始，我就問李彩樺係唔係真，佢一直否認㗎。」
排骨女星一直都想搵個有錢佬，等自己可以享盡榮華富貴，點知佢又唔好彩，搵咗個空心老倌，卒之撈咁耐都係連樓都冇層，間屋只係租嘅。不過呢輪商人男友欠佢人情，所以佢就趁機向商人要求買間千幾萬嘅樓。
雖然個商人依然鍾意佢，但商人呢輪都好手緊，成日問人借錢，重邊度有閒錢買樓畀佢？加上佢啲錢畀老婆管住，排骨女星想喺商人身上搵大着數都好難。