香港單車名將黃金寶與何兆麟禮拜一在釜山單車場地賽食咗一鋪詐胡，由大會最初公布嘅第二，突然間變為第七，這種突如其來嘅變化，對佢哋打擊真係好大。
小記在現場見到阿寶同阿麟嘅表情，由原先「四萬咁口」（笑口噬噬）就變咗「五筒咁款」（揦埋口面）；最尷尬就係喺收費台記者直播訪問嗰陣，阿寶講完點衝點突圍、戰術點樣運用，又到阿麟講全靠阿寶在關鍵時刻跟到日韓車手一起突圍至攞到銀牌，但最後獎牌落空，由高峯跌落谷底嘅心情，唔係人人頂得順，連收費台嘅記者都好唔好意思，就知阿寶同阿麟好難受！
好彩！兩位車手見慣大場面，收拾心情後昨日即刻捲土重來，幸好皇天不負苦心人，阿寶同阿麟嘅努力沒有白費，在麥迪遜賽贏番一面銅牌。呢次兩位就學乖了，賽後只係寬容咗啲，而小記同一班行家亦好識做，等埋賽會正式公布先恭喜佢哋同採訪，免得再出現「中空寶」時就要無辜辜要佢哋受雙重打擊。
話時話，港協都要反省吓，唔該啲資源最好平均啲分配，如果將啲聘請「國援」嘅部份資源，撥畀「港貨」度，我諗單車隊會多啲人幫手計時，唔使計錯分都冇人知啦！