盈富基金（2800）噚日又售出1.89億單位，涉資17億元，市場第一個反應又係估馬會基金掃貨，不過睇真啲，港股沽空亦同時大增至5.5億元，可能係基金做套戥，旨在賺差價。
保華德祥（498）突然宣布重組，將旗下中策（235）14.55%權益、保華德祥物業權益及澳洲公司DownerEDI36.83%轉讓予「爆棚哥」陳國強及佢旗下嘅德祥企業（372），保華德祥股東若同意轉讓協議，就可獲每股0.20元現金代價。
呢個變相將部份資產私有化嘅建議相當高明，每股0.20元現金代價，相對於保華德祥停牌前收市價0.183元亦吸引，但較資產帳面淨值大幅折讓逾90%，則似乎對保華德祥股東不甚公平，最妙係連保華德祥董事會之意見，亦話重組協議可能不公平不公正。「爆棚哥」被和黃（013）董事總經理霍建寧稱讚頭腦「轉數」高，話佢IQ「爆棚」，認真冇錯。
保華德祥復牌後，股價應聲急升15.85%，收報0.212元。黑客話，有關重組協議最終能否通過，實在令人懷疑。但阿虎相信「爆棚哥」不打冇把握嘅仗。
歐亞農業（932）主席楊斌被軟禁後，關於佢嘅新聞真係天天新款，但最弊莫過於營業額有水份嘅傳聞，唔單止歐亞唔掂，重牽連到其他上市民企，噚日傳出部份民企亦有同類情況。歐亞上市時由里昂任包銷，當時唔少歐資芬佬認購此股，主要係憧憬民企大有可為，而投資民企亦成為當時主流。現在歐亞出事，芬佬唔驚就假，超大（682）及大成（809）分別下挫15.7%及8.6%。
阿虎