秋風起，三蛇肥，八方三圍重肥！皆因呢排收到好多私房菜宣傳單張，山珍海味蛇貓狗乜都齊，簡直係珍饈百味，流晒口水。其中一張係嚟自煲呔曾嘅前「御廚」于燕平師傅。呢位御廚唔單止做菜撚手，自我宣傳都好到家。喺呢個二十三條立法在即，人人心驚膽跳嘅時候，發明咗一道輕鬆惹笑嘅「香港特區宴」，想話唔報道吓都唔得。
「香港特區宴」絕對極盡挖苦、搞笑之能事（見表）。時間關係，八方只能夠介紹三道菜。首先係「煲呔蝦廚師」。于師傅話，用二十幾種材料嚟煮蝦。佢話，俾煲呔「蝦」得好慘，唔止炒魷，重俾人封殺，所以要用滿腔怨憤嚟炮製呢味菜式。
跟住再嚟一道「效忠董建華」，主要材料係豬腳，于大廚覺得董建華蠢到好似隻豬咁，大家一定要好似狗腿子咁奉承佢，先會有好日子過。
至於「松哥插水教捉魚」，則是純粹攞景之作，主要材料係魚，乜嘢魚就悉隨尊便。于師傅話，阿松其實幾好人，起碼佢講明唔會救香港人，所以娶咗插水皇后。
「香港特區宴」由下禮拜起喺炮台山「樂廚房」應市。于燕平曾經兩度入稟向煲呔索償，結果一勝一負，計八方話，于師傅點都應該加多道菜，就係「于師傅炒魷魚」！
傳真︰2623-9278
電郵︰